[366] Sāvatthī . atha kho āyasmā rādho yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā rādho bhagavantaṃ etadavoca māro māroti bhante vuccati kittāvatā nu kho bhante māroti vuccatīti . rūpe kho rādha sati māro vā assa māretā vā yo vā pana miyyati tasmā tiha tvaṃ rādha rūpaṃ māroti passa māretāti passa miyyatīti passa rogoti passa gaṇḍoti passa sallanti passa aghanti passa aghabhūtanti passa ye naṃ evaṃ passanti te sammā passanti vedanāya sati . saññāya sati . saṅkhāresu sati . viññāṇe sati māro vā assa māretā vā yo vā pana miyyati tasmā tiha tvaṃ rādha viññāṇaṃ māroti passa māretāti passa miyyatīti passa rogoti passa gaṇḍoti passa sallanti passa aghanti passa aghabhūtanti passa ye naṃ evaṃ passanti te sammā passantīti. {366.1} Sammādassanaṃ pana bhante kimatthiyanti . Sammādassanaṃ kho rādha nibbidatthaṃ . nibbidā pana bhante kimatthiyāti . nibbidā kho rādha virāgatthā . Virāgo pana bhante kimatthiyoti . virāgo kho rādha vimuttattho . Vimutti pana bhante kimatthiyāti . vimutti kho rādha nibbānatthā . Nibbānaṃ pana bhante kimatthiyanti . accasarā rādha pañhaṃ nāsakkhi pañhassa pariyantaṃ gahetuṃ . nibbānogadhaṃ hi rādha brahmacariyaṃ vussati [2]- nibbānapariyosānanti.