[535] Sāvatthī . ekamantaṃ nisinno kho so bhikkhu bhagavantaṃ etadavoca ko nu kho bhante hetu ko paccayo yena midhekacco kāyassa bhedā paraṃ maraṇā jalābujānaṃ supaṇṇānaṃ .pe. saṃsedajānaṃ supaṇṇānaṃ . upapātikānaṃ supaṇṇānaṃ sahabyataṃ upapajjatīti . Idha bhikkhu ekacco kāyena dvayakārī hoti vācāya dvayakārī manasā dvayakārī tassa sutaṃ hoti upapātikā supaṇṇā dīghāyukā vaṇṇavanto sukhabahulāti . tassa evaṃ hoti aho vatāhaṃ kāyassa Bhedā paraṃ maraṇā upapātikānaṃ supaṇṇānaṃ sahabyataṃ upapajjeyyanti . So annaṃ deti pānaṃ deti vatthaṃ deti yānaṃ deti mālaṃ deti gandhaṃ deti vilepanaṃ deti seyyaṃ deti āvasathaṃ deti padīpeyyaṃ deti. So kāyassa bhedā paraṃ maraṇā upapātikānaṃ supaṇṇānaṃ sahabyataṃ upapajjati . ayaṃ kho bhikkhu hetu ayaṃ paccayo yena midhekacco kāyassa bhedā paraṃ maraṇā upapātikānaṃ supaṇṇānaṃ sahabyataṃ upapajjatīti . (evaṃ piṇḍikena chacattāḷīsaṃ suttantā honti). Supaṇṇasaṃyuttaṃ niṭṭhitaṃ. Tassuddānaṃ suddhakaṃ harati ceva dvayakārī caturopi ca dānūpakārā cattāro supaṇṇehi suppakāsitāti. ----------