[132] Katamo pana bhante hetu katamo paccayo sattānaṃ visuddhiyā kathaṃ sahetū sappaccayā sattā visujjhantīti . rūpañca hidaṃ mahali ekantasukhaṃ abhavissa sukhānupatitaṃ sukhāvakkantaṃ anavakkantaṃ dukkhena na yidaṃ sattā rūpasmiṃ nibbindeyyuṃ . yasmā ca kho mahali rūpaṃ dukkhaṃ dukkhānupatitaṃ dukkhāvakkantaṃ anavakkantaṃ sukhena tasmā sattā rūpasmiṃ nibbindanti nibbindaṃ virajjanti virāgā visujjhanti . ayaṃpi kho mahali hetu ayaṃ paccayo sattānaṃ visuddhiyā. Evaṃpi sahetū sappaccayā sattā visujjhanti . vedanā ca hidaṃ mahali ekantasukhā abhavissa .pe. saññā ca hidaṃ mahali . Saṅkhārā ca hidaṃ mahali ekantasukhā abhavissaṃsu . viññāṇañca hidaṃ mahali ekantasukhaṃ abhavissa sukhānupatitaṃ sukhāvakkantaṃ anavakkantaṃ dukkhena na yidaṃ sattā viññāṇasmiṃ nibbindeyyuṃ . yasmā ca kho mahali viññāṇaṃ dukkhaṃ dukkhānupatitaṃ dukkhāvakkantaṃ anavakkantaṃ sukhena tasmā sattā viññāṇasmiṃ nibbindanti nibbindaṃ virajjanti virāgā visujjhanti . ayaṃpi kho mahali hetu ayaṃ paccayo sattānaṃ Visuddhiyā. Evaṃpi sahetū sappaccayā sattā visujjhantīti.