[214] Lābhā vo bhikkhave suladdhaṃ vo bhikkhave khaṇo vo bhikkhave paṭiladdho brahmacariyavāsāya . diṭṭhā mayā bhikkhave cha phassāyatanikā nāma nirayā tattha yaṅkiñci cakkhunā rūpaṃ passati aniṭṭharūpaṃyeva passati no iṭṭharūpaṃ akantarūpaṃyeva passati no kantarūpaṃ amanāparūpaṃyeva passati no manāparūpaṃ yaṅkiñci sotena saddaṃ suṇāti . yaṅkiñci ghānena gandhaṃ ghāyati . Yaṅkiñci jivhāya rasaṃ sāyati . yaṅkiñci kāyena phoṭṭhabbaṃ phusati . Yaṅkiñci manasā dhammaṃ vijānāti aniṭṭharūpaṃyeva vijānāti no iṭṭharūpaṃ akantarūpaṃ yeva vijānāti no kantarūpaṃ amanāpaṃyeva vijānāti no manāparūpaṃ.

[215] Lābhāvo bhikkhave suladdhaṃ vo bhikkhave khaṇo vo bhikkhave paṭiladdho brahmacariyavāsāya . diṭṭhā mayā bhikkhave cha phassāyatanikā nāma saggā tattha yaṅkiñci cakkhunā rūpaṃ passati iṭṭharūpaṃ yeva passati no aniṭṭharūpaṃ kantarūpaṃ yeva passati no akantarūpaṃ manāparūpaṃ yeva passati no amanāparūpaṃ .pe. Yaṅkiñci jivhāya rasaṃ sāyati .pe. yaṅkiñci manasā dhammaṃ vijānāti iṭṭharūpaṃ yeva vijānāti no aniṭṭharūpaṃ kantarūpaṃ yeva vijānāti no akantarūpaṃ manāparūpaṃyeva vijānāti no amanāparūpaṃ . Lābhā vo bhikkhave suladdhaṃ vo bhikkhave khaṇo vo bhikkhave paṭiladdho brahmacariyavāsāyāti. Dutiyaṃ.