[322] Ekaṃ samayaṃ bhagavā ajjheyaṃ viharati gaṅgāya nadiyā tīre. Addasā kho bhagavā mahantaṃ dārukkhandhaṃ gaṅgāya nadiyā tīre sotena vuyhamānaṃ disvāna bhikkhū āmantesi passatha no tumhe bhikkhave Amuṃ mahantaṃ dārukkhandhaṃ gaṅgāya nadiyā sotena vuyhamānanti . Evaṃ bhante . sace kho bhikkhave dārukkhandho na orimaṃ tīraṃ upagacchati na pārimaṃ tīraṃ upagacchati na majjhe saṃsīdissati na thale ussādissati na manussaggāho gāhiyati na amanussaggāho gāhiyati na āvaṭṭaggāho gāhiyati na antopūti bhavissati . evaṃ hi so bhikkhave dārukkhandho samuddaninno bhavissati samuddapoṇo samuddapabbhāro . taṃ kissa hetu . samuddaninno bhikkhave gaṅgāya nadiyā soto samuddapoṇo samuddapabbhāro. {322.1} Evameva kho bhikkhave sace tumhepi na orimaṃ tīraṃ upagacchatha na pārimaṃ tīraṃ upagacchatha na majjhe saṃsīdissatha na thale ussādissatha . na manussaggāho gāhiyati na amanussaggāho gāhiyati na āvaṭṭaggāho gāhiyati na antopūti bhavissati. Evaṃ tumhe bhikkhave nibbānaninnā bhavissatha nibbānapoṇā nibbānapabbhārā . taṃ kissa hetu . nibbānaninnā bhikkhave sammādiṭṭhi nibbānapoṇā nibbānapabbhārāti.

[323] Evaṃ vutte aññataro bhikkhu bhagavantaṃ etadavoca kiṃ nu kho bhante orimaṃ tīraṃ kiṃ pārimaṃ tīraṃ ko majjhe saṃsīdito ko thale ussādo ko manussaggāho ko amanussaggāho ko āvaṭṭaggāho ko antopūtibhāvoti . orimaṃ tīranti kho bhikkhu channetaṃ ajjhattikānaṃ āyatanānaṃ adhivacanaṃ . pārimaṃ tīranti Kho bhikkhu channetaṃ bāhirānaṃ āyatanānaṃ adhivacanaṃ . majjhe saṃsīditoti kho bhikkhu nandirāgassetaṃ adhivacanaṃ. Thale ussādoti kho bhikkhu asmimānassetaṃ adhivacanaṃ. {323.1} Katamo ca bhikkhu manussaggāho . idha bhikkhu gihīhi saṃsaṭṭho viharati sahanandi sahasokī sukhitesu sukhito dukkhitesu dukkhito uppannesu kiccakaraṇīyesu attano yogaṃ āpajjati . ayaṃ vuccati bhikkhu manussaggāho. {323.2} Katamo ca bhikkhu amanussaggāho . Idha bhikkhu ekacco aññataraṃ devanikāyaṃ paṇidhāya brahmacariyaṃ carati imināhaṃ sīlena vā vattena vā tapena vā brahmacariyena vā devo vā bhavissāmi devaññataro vāti. Ayaṃ vuccati bhikkhu amanussaggāho. Āvaṭṭaggāhoti kho bhikkhu pañcannetaṃ kāmaguṇānaṃ adhivacanaṃ . Katamo ca bhikkhu antopūtibhāvo. Idha bhikkhu ekacco dussīlo hoti pāpadhammo asuci saṅkassarasamācāro paṭicchannakammanto assamaṇo samaṇapaṭiñño abrahmacārī brahmacārīpaṭiñño antopūti avassuto kasambukajāto . Ayaṃ vuccati bhikkhu antopūtibhāvoti.