[497] Ekaṃ samayaṃ āyasmā sārīputto magadhesu viharati nālagāmake . atha kho jambukhādako paribbājako yenāyasmā sārīputto tenupasaṅkami upasaṅkamitvā āyasmatā sārīputtena saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho jambukhādako paribbājako āyasmantaṃ sārīputtaṃ etadavoca nibbānaṃ nibbānanti āvuso sārīputta vuccati katamaṃ nu kho āvuso nibbānanti. {497.1} Yo kho āvuso rāgakkhayo dosakkhayo mohakkhayo idaṃ vuccati nibbānanti . atthi panāvuso maggo atthi paṭipadā etassa nibbānassa sacchikiriyāyāti . atthi kho āvuso maggo atthi paṭipadā etassa nibbānassa sacchikiriyāyāti . katamo panāvuso maggo katamā paṭipadā etassa nibbānassa sacchikiriyāyāti . ayameva kho āvuso ariyo aṭṭhaṅgiko maggo etassa nibbānassa sacchikiriyāya . seyyathīdaṃ . sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi . ayaṃ kho āvuso maggo ayaṃ paṭipadā etassa nibbānassa sacchikiriyāyāti . bhaddako āvuso maggo bhaddikā paṭipadā etassa nibbānassa sacchikiriyāya alañca panāvuso sārīputta appamādāyāti.

[498] Arahattaṃ arahattanti āvuso sārīputta vuccati katamaṃ Nu kho āvuso arahattanti . yo kho āvuso rāgakkhayo dosakkhayo mohakkhayo idaṃ vuccati arahattanti . atthi panāvuso maggo atthi paṭipadā etassa arahattassa sacchikiriyāyāti . atthi kho āvuso maggo atthi paṭipadā etassa arahattassa sacchikiriyāyāti . Katamo panāvuso maggo katamā paṭipadā etassa arahattassa sacchikiriyāyāti . ayameva kho āvuso ariyo aṭṭhaṅgiko maggo etassa arahattassa sacchikiriyāya . seyyathīdaṃ . sammādiṭṭhi .pe. sammāsamādhi . ayaṃ kho āvuso maggo ayaṃ paṭipadā etassa arahattassa sacchikiriyāyāti . bhaddako āvuso maggo bhaddikā paṭipadā etassa arahattassa sacchikiriyāya alañca panāvuso sārīputta appamādāyāti.

[499] Ke nu kho āvuso sārīputta loke dhammavādino ke loke supaṭipannā ke loke sugatāti . ye kho āvuso rāgappahānāya dhammaṃ desenti dosappahānāya dhammaṃ desenti mohappahānāya dhammaṃ desenti te loke dhammavādino . ye kho āvuso rāgassa pahānāya paṭipannā dosassa pahānāya paṭipannā mohassa pahānāya paṭipannā te loke supaṭipannā . yesaṃ kho āvuso rāgo pahīno ucchinnamūlo tālāvatthukato anabhāvaṅgato āyatiṃ anuppādadhammo doso pahīno ucchinnamūlo tālāvatthukato anabhāvaṅgato āyatiṃ anuppādadhammo moho pahīno Ucchinnamūlo tālāvatthukato anabhāvaṅgato āyatiṃ anuppādadhammo te loke sugatāti. {499.1} Atthi panāvuso maggo atthi paṭipadā etassa rāgassa dosassa mohassa pahānāyāti . atthi kho āvuso maggo atthi paṭipadā etassa rāgassa dosassa mohassa pahānāyāti . katamo panāvuso maggo katamā paṭipadā etassa rāgassa dosassa mohassa pahānāyāti . ayameva kho āvuso ariyo aṭṭhaṅgiko maggo etassa rāgassa dosassa mohassa pahānāya . seyyathīdaṃ . sammādiṭṭhi .pe. sammāsamādhi . Ayaṃ kho āvuso maggo ayaṃ paṭipadā etassa rāgassa dosassa mohassa pahānāyāti . bhaddako āvuso maggo bhaddikā paṭipadā etassa rāgassa dosassa mohassa pahānāya alañca pana āvuso sārīputta appamādāyāti.