[580] Tena kho pana samayena acelo kassapo macchikasaṇḍaṃ anuppatto hoti cittassa gahapatino purāṇagihisahāyo . assosi kho citto gahapati acelo kira kassapo macchikasaṇḍaṃ anuppatto amhākaṃ purāṇagihisahāyoti . atha kho citto gahapati yena acelo kassapo tenupasaṅkami upasaṅkamitvā acelena kassapena saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho citto gahapati acelaṃ kassapaṃ etadavoca kīvaciraṃ pabbajitosi bhante kassapāti . tiṃsamattāni kho me gahapati vassāni pabbajitassāti . imehi pana te bhante tiṃsamattehi vassehi atthi koci uttarimanussadhammo alamariyañāṇadassanaviseso adhigato phāsuvihāroti . imehi kho me gahapati tiṃsamattehi vassehi natthi koci uttarimanussadhammo alamariyañāṇadassanaviseso adhigato phāsuvihāro aññatra naggeyyā ca muṇḍeyyā ca vāḷanippotanāya cāti.

[581] Evaṃ vutte citto gahapati acelaṃ kassapaṃ etadavoca acchariyaṃ vata bho abbhutaṃ vata bho dhammassa svākkhātatā yatra hi nāma tiṃsamattehi vassehi na koci uttarimanussadhammo alamariyañāṇadassanaviseso adhigato bhavissati phāsuvihāro aññatra naggeyyā ca muṇḍeyyā ca vāḷanippotanāya cāti. Tuyhampana gahapati Kīvaciraṃ upāsakattaṃ upagatassāti . mayhampi kho pana bhante tiṃsamattāni vassāni upāsakattaṃ upagatassāti . imehi pana te gahapati tiṃsamattehi vassehi atthi koci uttarimanussadhammo alamariyañāṇadassanaviseso adhigato phāsuvihāroti . gihinopi siyā bhante ahaṃ hi bhante yāvadeva ākaṅkhāmi vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamajjhānaṃ upasampajja viharāmi. Ahaṃ hi bhante yāvadeva ākaṅkhāmi vitakkavicārānaṃ vūpasamā .pe. dutiyajjhānaṃ upasampajja viharāmi . ahaṃ hi bhante yāvadeva ākaṅkhāmi pītiyā ca virāgā .pe. Tatiyajjhānaṃ upasampajja viharāmi . ahañhi bhante yāvadeva ākaṅkhāmi sukhassa ca pahānā .pe. catutthajjhānaṃ upasampajja viharāmi . sace kho panāhaṃ bhante bhagavatā paṭhamataraṃ byākareyyaṃ . Anacchariyaṃ kho panetaṃ yaṃ maṃ bhagavā evaṃ byākareyya natthi taṃ saññojanaṃ yena saññojanena saṃyutto citto gahapati puna imaṃ lokaṃ āgaccheyyāti.