[603] Ekaṃ samayaṃ bhagavā nāḷandāyaṃ viharati pāvārikambavane. Atha kho asibandhakaputto gāmaṇī yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho asibandhakaputto gāmaṇī bhagavantaṃ etadavoca nanu bhante bhagavā sabbapāṇabhūtahitānukampī viharatīti . evaṃ gāmaṇi tathāgato sabbapāṇabhūtahitānukampī viharatīti . atha kiñcarahi bhante bhagavā ekaccānaṃ sakkaccaṃ dhammaṃ deseti ekaccānaṃ no tathā sakkaccaṃ dhammaṃ desetīti . tenahi gāmaṇi taññevettha paṭipucchissāmi . yathā te khameyya tathā naṃ byākareyyāsi . taṃ kiṃ maññasi gāmaṇi idha kassakassa gahapatino tīṇi khettāni ekaṃ khettaṃ aggaṃ ekaṃ khettaṃ majjhimaṃ ekaṃ khettaṃ hīnaṃ jaṅgalaṃ Osaraṃ pāpabhūmi. {603.1} Taṃ kiṃ maññasi gāmaṇi asu kassako gahapati vījāni patiṭṭhapetukāmo kattha paṭhamaṃ patiṭṭhapeyya yaṃ vā aduṃ khettaṃ aggaṃ yaṃ vā aduṃ khettaṃ majjhimaṃ yaṃ vā aduṃ khettaṃ hīnaṃ jaṅgalaṃ osaraṃ pāpabhūminti . asu bhante kassako gahapati bījāni patiṭṭhapetukāmo yaṃ aduṃ khettaṃ aggaṃ tattha patiṭṭhapeyya tattha patiṭṭhapetvā yaṃ aduṃ khettaṃ majjhimaṃ tattha patiṭṭhapeyya tattha patiṭṭhapetvā yaṃ aduṃ khettaṃ hīnaṃ jaṅgalaṃ osaraṃ pāpabhūmi tattha patiṭṭhapeyyapi nopi patiṭṭhapeyya . taṃ kissa hetu . antamaso gobhattaṃpi bhavissatīti.

[604] Seyyathāpi gāmaṇi yaṃ aduṃ khettaṃ aggaṃ evameva mayhaṃ bhikkhu bhikkhuniyo tesāhaṃ dhammaṃ desemi ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsemi . taṃ kissa hetu . ete hi gāmaṇi maṃdīpā maṃleṇā maṃtāṇā maṃsaraṇā viharanti . seyyathāpi gāmaṇi yaṃ aduṃ khettaṃ majjhimaṃ evameva mayhaṃ upāsakā upāsikāyo tesāhaṃ dhammaṃ desemi ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsemi . taṃ kissa hetu . ete hi gāmaṇi maṃdīpā maṃleṇā maṃtāṇā maṃsaraṇā viharanti . seyyathāpi gāmaṇi yaṃ aduṃ khettaṃ hīnaṃ jaṅgalaṃ osaraṃ pāpabhūmi evameva mayhaṃ aññatitthiyā Samaṇabrāhmaṇaparibbājakā nesaṃ cāhaṃ dhammaṃ desemi ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsemi.