[608] Ekaṃ samayaṃ bhagavā nāḷandāyaṃ viharati pāvārikambavane. Atha kho asibandhakaputto gāmaṇī nigaṇṭhasāvako yena bhagavā tenupasaṅkami upasaṅkamitvā .pe. ekamantaṃ nisinnaṃ kho asibandhakaputtaṃ gāmaṇiṃ bhagavā etadavoca kathaṃ nu kho gāmaṇi nigaṇṭho Nāṭaputto sāvakānaṃ dhammaṃ desetīti . evaṃ kho bhante nigaṇṭho nāṭaputto sāvakānaṃ dhammaṃ deseti yokoci pāṇaṃ atimāpeti sabbo so āpāyiko nerayiko yokoci adinnaṃ ādiyati sabbo so āpāyiko nerayiko yokoci kāmesu micchācarati sabbo so āpāyiko nerayiko yokoci musā bhaṇati sabbo so āpāyiko nerayiko yaṃ bahulaṃ yaṃ bahulaṃ viharati tena tena niyyatīti . evaṃ kho bhante nigaṇṭho nāṭaputto sāvakānaṃ dhammaṃ desetīti.

[609] Yaṃ bahulaṃ yaṃ bahulaṃ ca gāmaṇi viharati tena tena niyyatīti . evaṃ sante na koci āpāyiko nerayiko bhavissati yathā nigaṇṭhassa nāṭaputtassa vacanaṃ . taṃ kiṃ maññasi gāmaṇi yo so puriso pāṇātipātī rattiyā vā divasassa vā samayāsamayaṃ upādāya katamo bahutaro samayo yaṃ so pāṇaṃ atimāpeti yaṃ vā so pāṇaṃ nātimāpetīti . yo so bhante puriso pāṇātipātī rattiyā vā divasassa vā samayāsamayaṃ upādāya appataro so samayo yaṃ so pāṇaṃ atimāpeti . atha kho sveva bahutaro samayo yaṃ so pāṇaṃ nātimāpetīti . yaṃ bahulaṃ yaṃ bahulaṃ ca gāmaṇi viharati tena tena niyyatīti . evaṃ sante na koci āpāyiko nerayiko bhavissati yathā nigaṇṭhassa nāṭaputtassa vacanaṃ.

[610] Taṃ kiṃ maññasi gāmaṇi yo so puriso adinnādāyī Rattiyā vā divasassa vā samayāsamayaṃ upādāya katamo bahutaro samayo yaṃ so adinnaṃ ādiyati yaṃ vā so adinnaṃ nādiyatīti . Yo so bhante puriso adinnādāyī rattiyā vā divasassa vā samayāsamayaṃ upādāya appataro so samayo yaṃ so adinnaṃ ādiyati . atha kho sveva bahutaro samayo yaṃ so adinnaṃ nādiyatīti . yaṃ bahulaṃ yaṃ bahulaṃ ca gāmaṇi viharati tena tena niyyatīti . evaṃ sante na koci āpāyiko nerayiko bhavissati yathā nigaṇṭhassa nāṭaputtassa vacanaṃ.