[752] Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tena kho pana samayena khemā bhikkhunī kosalesu cārikaṃ caramānā antarā ca sāvatthiṃ antarā ca sāketaṃ toraṇavatthusmiṃ vāsaṃ upagatā hoti . atha kho rājā pasenadikosalo sāketā sāvatthiṃ gacchanto antarā ca sāvatthiṃ antarā ca sāketaṃ toraṇavatthusmiṃ ekarattivāsaṃ upagacchati . atha kho rājā pasenadikosalo aññataraṃ purisaṃ āmantesi ehi tvaṃ ambho purisa toraṇavatthusmiṃ tathārūpaṃ samaṇaṃ vā brāhmaṇaṃ vā jāna yamahaṃ ajja payirupāseyyanti . evaṃ devāti kho so puriso rañño pasenadikosalassa paṭissutvā kevalakappaṃ toraṇavatthuṃ āhiṇḍanto nāddasa tathārūpaṃ samaṇaṃ vā brāhmaṇaṃ vā yaṃ rājā pasenadikosalo payirupāseyya.

[753] Addasā kho so puriso khemaṃ bhikkhuniṃ toraṇavatthusmiṃ vāsaṃ upagataṃ disvāna yena rājā pasenadikosalo tenupasaṅkami upasaṅkamitvā rājānaṃ pasenadikosalaṃ etadavoca natthi kho deva toraṇavatthusmiṃ tathārūpo samaṇo vā brāhmaṇo vā yaṃ devo payirupāseyya . atthi ca kho deva khemā nāma bhikkhunī tassa bhagavato sāvikā arahato sammāsambuddhassa . tassā kho pana Ayyāya evaṃkalyāṇo kittisaddo abbhuggato paṇḍitā byattā medhāvinī bahussutā cittakathī kalyāṇapaṭibhāṇāti . Taṃ devo payirupāsatūti.

[754] Atha kho rājā pasenadikosalo yena khemā bhikkhunī tenupasaṅkami upasaṅkamitvā khemaṃ bhikkhuniṃ abhivādetvā ekamantaṃ nisīdi . ekamantaṃ nisinno kho rājā pasenadikosalo khemaṃ bhikkhuniṃ etadavoca kiṃ nu kho ayye hoti tathāgato paraṃ maraṇāti . Abyākataṃ kho etaṃ mahārāja bhagavatā hoti tathāgato paraṃ maraṇāti. Kiṃ panayye na hoti tathāgato paraṃ maraṇāti . etampi kho mahārāja abyākataṃ bhagavatā na hoti tathāgato paraṃ maraṇāti . kiṃ nu kho ayye hoti ca na ca hoti tathāgato paraṃ maraṇāti . Abyākataṃ kho etaṃ mahārāja bhagavatā hoti ca na ca hoti tathāgato paraṃ maraṇāti . kiṃ panayye neva hoti na na hoti tathāgato paraṃ maraṇāti . etampi kho mahārāja abyākataṃ bhagavatā neva hoti na na hoti tathāgato paraṃ maraṇāti.