[112] Atha kho āyasmā puṇṇo yena bhagavā tenupasaṅkami .pe. Ekamantaṃ nisinno kho āyasmā puṇṇo bhagavantaṃ etadavoca sādhu me bhante bhagavā saṅkhittena dhammaṃ desetu yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyyanti . santi kho puṇṇa cakkhuviññeyyā rūpā iṭṭhā kantā manāpā piyarūpā kāmūpasañhitā rajaniyā tañce bhikkhu abhinandati abhivadati ajjhosāya tiṭṭhati tassa taṃ abhinandato abhivadato ajjhosāya tiṭṭhato uppajjati nandi nandisamudayā dukkhasamudayo puṇṇāti vadāmi .pe. santi kho puṇṇa jivhāviññeyyā rasā .pe. santi kho puṇṇa manoviññeyyā dhammā iṭṭhā kantā manāpā piyarūpā kāmūpasañhitā rajaniyā Tañca bhikkhu abhinandati abhivadati ajjhosāya tiṭṭhati tassa taṃ abhinandato abhivadato ajjhosāya tiṭṭhato uppajjati nandi nandisamudayā dukkhasamudayo puṇṇāti vadāmi.

[113] Santi [1]- kho puṇṇa cakkhuviññeyyā rūpā iṭṭhā kantā manāpā piyarūpā kāmūpasañhitā rajaniyā tañce bhikkhu nābhinandati nābhivadati nājjhosāya tiṭṭhati tassa taṃ anabhinandato anabhivadato anajjhosāya tiṭṭhato nirujjhati nandi nandinirodhā dukkhanirodho puṇṇāti vadāmi .pe. santi ca kho puṇṇa manoviññeyyā dhammā iṭṭhā kantā manāpā piyarūpā kāmūpasañhitā rajaniyā tañce bhikkhu nābhinandati nābhivadati nājjhosāya tiṭṭhati tassa taṃ anabhinandato anabhivadato anajjhosāya tiṭṭhato nirujjhati nandi nandinirodhā dukkhanirodho puṇṇāti vadāmi . iminā tvaṃ puṇṇa ārakā so imasmā dhammavinayāti.

[114] Evaṃ vutte aññataro bhikkhu bhagavantaṃ etadavoca etthāhaṃ bhante anassāsaṃ ahaṃ hi bhante channaṃ phassāyatanānaṃ samudayañca atthaṅgamañca assādañca ādīnavañca nissaraṇañca yathābhūtaṃ nappajānāmīti . taṃ kiṃ maññasi bhikkhu . cakkhuṃ netaṃ mama nesohamasmi na meso attāti samanupassasīti . evaṃ bhante . sādhu bhikkhu ettha ca te bhikkhu cakkhuṃ netaṃ mama nesohamasmi na meso attāti evametaṃ yathābhūtaṃ sammappaññāya sudiṭṭhaṃ bhavissati Evante etaṃ paṭhamaṃ phassāyatanaṃ pahīnaṃ bhavissati āyatiṃ apunabbhavāya .pe. jivhaṃ netaṃ mama nesohamasmi na meso attāti samanupassasīti . evaṃ bhante . sādhu bhikkhu tattha te bhikkhu jivhā netaṃ mama nesohamasmi na meso attāti evametaṃ yathābhūtaṃ sammappaññāya sudiṭṭhaṃ bhavissati evaṃ te etaṃ catutthaṃ phassāyatanaṃ pahīnaṃ bhavissati āyatiṃ apunabbhavāya .pe. manaṃ netaṃ mama nesohamasmi na meso attāti samanupassasīti . evaṃ bhante .pe. sādhu puṇṇa mayā saṅkhittena ovādena ovadito katamasmiṃ janapade viharissasīti . atthi bhante sunāparanto nāma janapado tatthāhaṃ viharissāmīti.