[167] Santi bhikkhave cakkhuviññeyyā rūpā iṭṭhā kantā manāpā piyarūpā kāmūpasañhitā rajaniyā tañce bhikkhu abhinandati abhivadati ajjhosāya tiṭṭhati . ayaṃ vuccati bhikkhave bhikkhu bandho cakkhuviññeyyesu rūpesu āvāsagato mārassa mārassa vasaṃ gato yathākāmakaraṇīyo pāpimato .pe. santi bhikkhave jivhāviññeyyā rasā .pe. santi bhikkhave manoviññeyyā dhammā iṭṭhā kantā manāpā piyarūpā kāmūpasañhitā rajaniyā tañce bhikkhu abhinandati abhivadati ajjhosāya tiṭṭhati . ayaṃ vuccati bhikkhave bhikkhu bandho manoviññeyyesu dhammesu āvāsagato mārassa mārassa vasaṃ gato yathākāmakaraṇīyo pāpimato.

[168] Santi ca kho bhikkhave cakkhuviññeyyā rūpā iṭṭhā kantā manāpā piyarūpā kāmūpasañhitā rajaniyā tañce bhikkhu nābhinandati nābhivadati na ajjhosāya tiṭṭhati . ayaṃ vuccati Bhikkhave bhikkhu mutto cakkhuviññeyyehi rūpehi na āvāsagato mārassa na mārassa vasaṃ gato na yathākāmakaraṇīyo pāpimato .pe. Santi bhikkhave jivhāviññeyyā rasā .pe. santi bhikkhave manoviññeyyā dhammā iṭṭhā kantā manāpā piyarūpā kāmūpasañhitā rajaniyā tañce bhikkhu na abhinandati na abhivadati na ajjhosāya tiṭṭhati . ayaṃ vuccati bhikkhave bhikkhu mutto manoviññeyyehi dhammehi na āvāsagato mārassa na mārassa vasaṃ gato na yathākāmakaraṇīyo pāpimatoti. Dutiyaṃ.