[177] Ekaṃ samayaṃ bhagavā rājagahe viharati gijjhakūṭe pabbate. Atha kho sakko devānamindo yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ aṭṭhāsi . ekamantaṃ ṭhito kho sakko devānamindo bhagavantaṃ etadavoca ko nu kho Bhante hetu ko paccayo yena midhekacce sattā diṭṭhe va dhamme no parinibbāyanti . ko pana bhante hetu ko paccayo yena midhekacce sattā diṭṭhe va dhamme parinibbāyantīti.

[178] Santi ca kho devānaminda cakkhuviññeyyā rūpā iṭṭhā kantā manāpā piyarūpā kāmūpasañhitā rajaniyā tañce bhikkhu abhinandati abhivadati ajjhosāya tiṭṭhati tassa taṃ abhinandato abhivadato ajjhosāya tiṭṭhato taṃ nissitaṃ viññāṇaṃ hoti tadupādānaṃ. {178.1} Saupādāno devānaminda bhikkhu no parinibbāyati .pe. Santi kho devānaminda jivhāviññeyyā rasā .pe. santi kho devānaminda manoviññeyyā dhammā iṭṭhā kantā manāpā piyarūpā kāmūpasañhitā rajaniyā tañce bhikkhu abhinandati abhivadati ajjhosāya tiṭṭhati tassa taṃ abhinandato abhivadato ajjhosāya tiṭṭhato taṃ nissitaṃ viññāṇaṃ hoti tadupādānaṃ . saupādāno devānaminda bhikkhu no parinibbāyati . ayaṃ kho devānaminda hetu ayaṃ paccayo yena midhekacce sattā diṭṭhe va dhamme no parinibbāyanti.

[179] Santi ca kho devānaminda cakkhuviññeyyā rūpā iṭṭhā kantā manāpā piyarūpā kāmūpasañhitā rajaniyā tañce bhikkhu nābhinandati nābhivadati nājjhosāya tiṭṭhati tassa taṃ anabhinandato anabhivadato anajjhosāya tiṭṭhato na taṃ nissitaṃ viññāṇaṃ hoti na tadupādānaṃ . anupādāno devānaminda bhikkhu parinibbāyati Santi kho devānaminda jivhāviññeyyā rasā .pe. Santi kho devānaminda manoviññeyyā dhammā iṭṭhā kantā manāpā piyarūpā kāmūpasañhitā rajaniyā tañce bhikkhu nābhinandati nābhivadati nājjhosāya tiṭṭhati tassa taṃ anabhinandato anabhivadato anajjhosāya tiṭṭhato na tannissitaṃ viññāṇaṃ hoti na tadupādānaṃ . Anupādāno devānaminda bhikkhu parinibbāyati . ayaṃ kho devānaminda hetu ayaṃ paccayo yena midhekacce sattā diṭṭhe va dhamme parinibbāyantīti. Pañcamaṃ.