[205] Ekaṃ samayaṃ āyasmā mahākaccāno avantīsu viharati makkarakaṭe araññakuṭikāyaṃ . atha kho lohiccassa brāhmaṇassa Sambahulā antevāsikā kaṭṭhahārakā māṇavakā yenāyasmato mahākaccānassa araññakuṭikā tenupasaṅkamiṃsu upasaṅkamitvā parito parito kuṭikāyaṃ anucaṅkamanti anuvicaranti uccāsaddā mahāsaddā kānici kānici seleyyakāni karonti ime pana muṇḍakā samaṇakā ibbhā kaṇhā bandhupādāpaccā imesaṃ bhāratakānaṃ sakkatā garukatā mānitā pūjitā apacitāti . atha kho āyasmā mahākaccāno vihārā nikkhamitvā te māṇavake etadavoca mā [4]- māṇavakā saddamakattha dhammaṃ vo bhāsissāmīti . evaṃ vutte te māṇavakā tuṇhī ahesuṃ . atha kho āyasmā mahākaccāno te māṇavake gāthāhi ajjhabhāsi

[206] Sīluttamā pubbatarā ahesuṃ te brāhmaṇā ye purāṇaṃ saranti guttāni dvārāni surakkhitāni ahesu tesaṃ abhibhuyya kodhaṃ. Dhamme ca jhāne ca ratā ahesuṃ te brāhmaṇā ye purāṇaṃ saranti imeva vokkamma jahāmhaseti gottena mattā visamaṃ caranti. Kodhābhibhūtā suputhuttadaṇḍā virujjhamānā tasathāvaresu aguttadvārassa bhavanti moghā supineva laddhaṃ purisassa vittaṃ. Anāsakā thaṇḍilasāyikā ca pāto sinānañca tayo ca vedā kharājinaṃ jaṭā paṅko mantā sīlabbataṃ tapo kuhanā vaṅkadaṇḍā ca udakā ca manāni ca Vaṇṇā ete brāhmaṇānaṃ katā kiñcikkhabhāvanā cittañca susamāhitaṃ vippasannamanāvilaṃ akhilaṃ sabbabhūtesu so maggo brahmapattiyāti.

[207] Atha kho te māṇavakā kupitā anattamanā yena lohicco brāhmaṇo tenupasaṅkamiṃsu upasaṅkamitvā lohiccaṃ brāhmaṇaṃ etadavocuṃ yagghe bhavaṃ jāneyya samaṇo mahākaccāno brāhmaṇānaṃ mante ekaṃsena asaṃvadati paṭikkosatīti . evaṃ vutte lohicco brāhmaṇo kupito ahosi anattamano . atha kho lohiccassa brāhmaṇassa etadahosi na kho pana metaṃ paṭirūpaṃ yohaṃ aññadatthuṃ māṇavakānaṃyeva sutvā samaṇaṃ mahākaccānaṃ akkoseyyaṃ virujjheyyaṃ paribhāseyyaṃ yannūnāhaṃ upasaṅkamitvā puccheyyanti. {207.1} Atha kho lohicco brāhmaṇo tehi māṇavakehi saddhiṃ yenāyasmā mahākaccāno tenupasaṅkami upasaṅkamitvā āyasmatā mahākaccānena saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho lohicco brāhmaṇo āyasmantaṃ mahākaccānaṃ etadavoca āgamaṃsu nu khvidha bho kaccāna amhākaṃ sambahulā antevāsikā kaṭṭhahārakā māṇavakāti . āgamaṃsu khvidha te brāhmaṇa sambahulā antevāsikā kaṭṭhahārakā māṇavakāti . ahu pana bhoto kaccānassa tehi māṇavakehi saddhiṃ koci deva kathāsallāpoti. Ahu kho me brāhmaṇa tehi māṇavakehi saddhiṃ [3]- Ahosi kathāsallāpoti . yathā kathaṃ pana bhoto kaccānassa tehi māṇavakehi saddhiṃ ahosi kathāsallāpoti . evaṃ kho me brāhmaṇa tehi māṇavakehi saddhiṃ ahosi kathāsallāpoti. Siṃluttamā pubbatarā ahesuṃ te brāhmaṇā ye purāṇaṃ saranti .pe. Akhilaṃ sabbabhūtesu so maggo brahmapattiyāti. Evaṃ kho me brāhmaṇa tehi [1]- saddhiṃ ahosi kathāsallāpoti. Aguttadvāroti bhavaṃ kaccāno āha kittāvatā nu kho bho kaccāna aguttadvāro hotīti . idha brāhmaṇa ekacco cakkhunā rūpaṃ disvā piyarūpe rūpe adhimuccati appiyarūpe rūpe byāpajjati anupaṭṭhitāya satiyāva viharati parittacetaso tañca cetovimuttiṃ paññāvimuttiṃ yathābhūtaṃ nappajānāti yatthassa te uppannā pāpakā akusalā dhammā aparisesā nirujjhanti . sotena saddaṃ sutvā .pe. ghānena gandhaṃ ghāyitvā . jivhāya rasaṃ sāyitvā . Kāyena phoṭṭhabbaṃ phusitvā . manasā dhammaṃ viññāya piyarūpe dhamme adhimuccati appiyarūpe [3]- dhamme byāpajjati anupaṭṭhitāya satiyāva viharati parittacetaso tañca cetovimuttiṃ paññāvimuttiṃ yathābhūtaṃ nappajānāti yatthassa te uppannā pāpakā akusalā dhammā aparisesā nirujjhanti . evaṃ kho brāhmaṇa aguttadvāro hotīti.