[208] Acchariyaṃ bho kaccāna abbhūtaṃ bho kaccāna yāvañcidaṃ Bhotā kaccānena aguttadvārova samāno aguttadvāroti akkhāto . Guttadvāroti bhavaṃ kaccāno āha kittāvatā nu kho bho kaccāna guttadvāro hotīti . idha brāhmaṇa bhikkhu cakkhunā rūpaṃ disvā piyarūpe rūpe nādhimuccati appiyarūpe rūpe na byāpajjati upaṭṭhitāya satiyāva viharati appamāṇacetaso tañca cetovimuttiṃ paññāvimuttiṃ yathābhūtaṃ pajānāti . yatthassa te uppannā pāpakā akusalā dhammā aparisesā nirujjhanti . sotena saddaṃ sutvā . ghānena gandhaṃ ghāyitvā . jivhāya rasaṃ sāyitvā . kāyena phoṭṭhabbaṃ phusitvā . manasā dhammaṃ viññāya piyarūpe dhamme nādhimuccati appiyarūpe dhamme na byāpajjati upaṭṭhitāya satiyāva viharati appamāṇacetaso tañca cetovimuttiṃ paññāvimuttiṃ yathābhūtaṃ pajānāti yatthassa te uppannā pāpakā akusalā dhammā aparisesā nirujjhanti. Evaṃ kho brāhmaṇa guttadvāro hotīti.

[209] Acchariyaṃ bho kaccāna abbhūtaṃ bho kaccāna yāvañcidaṃ bhotā kaccānena guttadvārova samāno guttadvāroti akkhāto. Abhikkantaṃ bho kaccāna abhikkantaṃ ko kaccāna seyyathāpi bho kaccāna nikkujjitaṃ vā ukkujjeyya paṭicchannaṃ vā vivareyya mūḷhassa vā maggaṃ ācikkheyya andhakāre vā telappajjotaṃ dhāreyya cakkhumanto rūpāni dakkhantīti . evamevaṃ bho kaccānena anekapariyāyena dhammo pakāsito . esāhaṃ bho kaccāna taṃ Bhagavantaṃ saraṇaṃ gacchāmi dhammañca bhikkhusaṅghañca upāsakaṃ maṃ bhavaṃ kaccāno dhāretu ajjatagge pāṇupetaṃ saraṇaṅgataṃ . yathā ca bhavaṃ kaccāno makkarakaṭe upāsakakulāni upasaṅkamati evamevaṃ lohiccakulaṃ upasaṅkamatu . tattha ye māṇavakā māṇavikā vā bhavantaṃ kaccānaṃ abhivādessanti paccupaṭṭhissanti āharissanti āsanaṃ vā udakaṃ vā dassanti tesantaṃ bhavissati dīgharattaṃ hitāya sukhāyāti. Navamaṃ.