[291] Yassa kassaci bhikkhave bhikkhussa vā bhikkhuniyā vā cakkhuviññeyyesu rūpesu yo rāgo so atthi yo doso so atthi yo moho so atthi yo rāgo so appahīno yo doso so appahīno yo moho so appahīno tassa parittā cepi cakkhuviññeyyā rūpā cakkhussa āpāthaṃ āgacchanti pariyādiyantevassa cittaṃ . ko pana vādo adhimattānaṃ . taṃ kissa hetu . Yo bhikkhave rāgo so atthi yo doso so atthi yo moho so atthi yo rāgo so appahīno yo doso so appahīno yo moho so appahīno .pe. {291.1} Yassa kassaci bhikkhave bhikkhussa vā bhikkhuniyā vā manoviññeyyesu dhammesu yo rāgo so atthi yo doso so atthi yo moho so atthi yo rāgo so appahīno yo doso so appahīno yo moho so appahīno tassa parittā cepi manoviññeyyā dhammā manassa āpāthaṃ āgacchanti pariyādiyantevassa cittaṃ . ko pana vādo adhimattānaṃ . taṃ kissa hetu. Yo bhikkhave rāgo so atthi yo doso so atthi yo moho so atthi yo rāgo so appahīno yo doso so appahīno yo moho so appahīno.

[292] Seyyathāpi bhikkhave khīrarukkho assattho vā nigrodho vā milakkhu vā udumbaro vā daharo taruṇo komārako tamenaṃ puriso tiṇhāya kudhāriyā yato yato bhindeyya āgaccheyya khīranti. Evaṃ bhante. Taṃ kissa hetu. Yaṃ hi bhante khīraṃ taṃ atthīti. {292.1} Evameva kho bhikkhave yassa kassaci bhikkhussa vā bhikkhuniyā vā cakkhuviññeyyesu rūpesu yo rāgo so atthi yo doso so atthi yo moho so atthi yo rāgo so appahīno yo doso so appahīno yo moho so appahīno tassa parittā cepi cakkhuviññeyyā rūpā cakkhussa āpāthaṃ āgacchanti pariyādiyantevassa cittaṃ . ko pana vādo adhimattānaṃ . taṃ kissa hetu. Yo bhikkhave rāgo so atthi yo doso so atthi yo moho so atthi yo rāgo so appahīno yo doso so appahīno yo moho so appahīno .pe. {292.2} Yassa kassaci bhikkhave bhikkhussa vā bhikkhuniyā vā jivhāviññeyyesu rasesu yo rāgo so atthi .pe. yassa kassaci bhikkhave bhikkhussa vā bhikkhuniyā vā manoviññeyyesu dhammesu yo rāgo so atthi yo doso so atthi yo moho so atthi yo rāgo so appahīno yo doso so appahīno yo moho so appahīno tassa parittā cepi manoviññeyyā dhammā manassa āpāthaṃ āgacchanti pariyādiyantevassa cittaṃ . ko pana vādo adhimattānaṃ . taṃ kissa hetu . yo rāgo so atthi Yo doso so atthi yo moho so atthi yo rāgo so appahīno yo doso so appahīno yo moho so appahīno.