[295] Ekaṃ samayaṃ āyasmā ca sārīputto āyasmā ca mahākoṭṭhiko bārāṇasiyaṃ viharanti isipatane migadāye . atha kho āyasmā mahākoṭṭhiko sāyaṇhasamayaṃ paṭisallānā vuṭṭhito yenāyasmā sārīputto tenupasaṅkami upasaṅkamitvā āyasmatā sārīputtena saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho āyasmā mahākoṭṭhiko āyasmantaṃ sārīputtaṃ etadavoca kiṃ nu kho āvuso sārīputta cakkhu rūpānaṃ saññojanaṃ rūpā cakkhussa saññojanaṃ .pe. jivhā rasānaṃ saññojanaṃ rasā jivhāya saññojanaṃ .pe. mano dhammānaṃ saññojanaṃ dhammā manassa saññojananti . na kho āvuso koṭṭhika cakkhu rūpānaṃ saññojanaṃ na rūpā cakkhussa saññojanaṃ yañca tattha tadubhayaṃ paṭicca uppajjati chandarāgo taṃ tattha saññojanaṃ . na jivhā rasānaṃ saññojanaṃ na rasā jivhāya saññojanaṃ yañca tattha tadubhayaṃ paṭicca uppajjati chandarāgo taṃ tattha saññojanaṃ . .pe. Na mano dhammānaṃ saññojanaṃ na dhammā manassa saññojanaṃ yañca tattha tadubhayaṃ paṭicca uppajjati chandarāgo taṃ tattha saññojanaṃ.

[296] Seyyathāpi āvuso kāḷo ca balibaddo odāto ca balibaddo ekena dāmena vā yottena vā saṃyuttā assu yo nu kho evaṃ vadeyya kāḷo balibaddo odātassa balibaddassa saññojanaṃ odāto balibaddo kāḷassa balibaddassa saññojananti sammā nu kho so vadamāno vadeyyāti . no hetaṃ āvuso na kho āvuso kāḷo balibaddo odātassa balibaddassa saññojanaṃ napi odāto balibaddo kāḷassa balibaddassa saññojanaṃ yena ca kho te ekena dāmena vā yottena vā saṃyuttā taṃ tattha saññojanaṃ. {296.1} Evameva kho āvuso na cakkhu rūpānaṃ saññojanaṃ na rūpā cakkhussa saññojanaṃ yañca tattha tadubhayaṃ paṭicca uppajjati chandarāgo taṃ tattha saññojanaṃ .pe. na jivhā rasānaṃ saññojanaṃ .pe. Na mano dhammānaṃ saññojanaṃ na dhammā manassa saññojanaṃ yañca tattha tadubhayaṃ paṭicca uppajjati chandarāgo taṃ tattha saññojanaṃ.