[300] Ekaṃ samayaṃ āyasmā ca ānando āyasmā ca udāyi kosambiyaṃ viharanti ghositārāme . atha kho āyasmā udāyi sāyaṇhasamayaṃ paṭisallānā vuṭṭhito yenāyasmā ānando tenupasaṅkami upasaṅkamitvā āyasmatā ānandena saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho āyasmā udāyi āyasmantaṃ ānandaṃ etadavoca yatheva nu kho āvuso ānanda ayaṃ kāyo bhagavatā anekapariyāyena akkhāto vivaṭo pakāsito itipāyaṃ kāyo anattāti . sakkā evamevaṃ viññāṇampidaṃ ācikkhituṃ desetuṃ paññapetuṃ paṭṭhapetuṃ vivarituṃ vibhajituṃ uttānīkātuṃ itipidaṃ viññāṇaṃ anattāti . yatheva kho āvuso udāyi ayaṃ kāyo bhagavatā anekapariyāyena akkhāto vivaṭo pakāsito itipāyaṃ kāyo anattāti. Sakkā evamevaṃ viññāṇampidaṃ ācikkhituṃ desetuṃ paññapetuṃ paṭṭhapetuṃ vivarituṃ vibhajituṃ uttānīkātuṃ itipidaṃ viññāṇaṃ anattāti.

[301] Cakkhuñca āvuso paṭicca rūpe ca uppajjati cakkhuviññāṇanti . evamāvusoti . yo cāvuso hetu yo ca paccayo cakkhuviññāṇassa upādāya so ca hetu so ca paccayo sabbena Sabbaṃ sabbathā sabbaṃ aparisesā nirujjheyya api nu kho cakkhuviññāṇaṃ paññāyethāti . no hetaṃ āvuso imināpi kho etaṃ āvuso pariyāyena bhagavatā akkhātaṃ vivaṭaṃ pakāsitaṃ itipidaṃ viññāṇaṃ anattāti .pe. Jivhañcāvuso paṭicca rase ca uppajjati jivhāviññāṇanti . Evamāvusoti . yo cāvuso hetu yo ca paccayo jivhāviññāṇassa uppādāya so ca hetu so ca paccayo sabbena sabbaṃ sabbathā sabbaṃ aparisesā nirujjheyya api nu kho jivhāviññāṇaṃ paññāyethāti. No hetaṃ āvuso imināpi kho etaṃ āvuso pariyāyena bhagavatā akkhātaṃ vivaṭaṃ pakāsitaṃ itipidaṃ viññāṇaṃ anattāti .pe. manañcāvuso paṭicca dhamme ca uppajjati manoviññāṇanti . evamāvusoti . yo cāvuso hetu yo ca paccayo manoviññāṇassa uppādāya so ca hetu so ca paccayo sabbena sabbaṃ sabbathā sabbaṃ aparisesā nirujjheyya api nu kho manoviññāṇaṃ paññāyethāti . no hetaṃ āvuso imināpi kho etaṃ āvuso pariyāyena bhagavatā akkhātaṃ vivaṭaṃ pakāsitaṃ itipidaṃ viññāṇaṃ anattāti.