[307] Hatthesu bhikkhave sati ādānanikkhepanaṃ hoti pādesu sati abhikkamapaṭikkamo hoti pabbesu sati sammiñjanapasāraṇaṃ hoti kucchismiṃ sati jighacchāpipāsā hoti . evameva kho bhikkhave cakkhusmiṃ sati cakkhusamphassapaccayā uppajjati ajjhattaṃ sukhadukkhaṃ Jivhāya sati .pe. manasmiṃ sati manosamphassapaccayā uppajjati ajjhattaṃ sukhadukkhanti .

[308] Hatthesu bhikkhave asati ādānanikkhepanaṃ na hoti pādesu asati abhikkamapaṭikkamo na hoti pabbesu asati sammiñjanapasāraṇaṃ na hoti kucchismiṃ asati jighacchāpipāsā na hoti . evameva kho bhikkhave cakkhusmiṃ asati cakkhusamphassapaccayā nuppajjati ajjhattaṃ sukhadukkhaṃ .pe. jivhāsamphassapaccayā .pe. manasmiṃ asati manosamphassapaccayā nuppajjati ajjhattaṃ sukhadukkhanti. Samuddavaggo tatiyo. Tassuddānaṃ dve samuddā bāḷisiko khīrarukkhena koṭṭhiko kāmabhū udāyi ceva ādittena ca aṭṭhamaṃ hatthapādapabbā ceva vaggo tena pavuccatīti. -------------