[313] Atha kho so bhikkhave puriso bhīto catunnaṃ āsīvisānaṃ uggatejānaṃ ghoravisānaṃ bhīto pañcannaṃ vadhakānaṃ paccatthikānaṃ bhīto chaṭṭhassa antaracarassa vadhakassa ukkhittāsikassa bhīto corānaṃ gāmaghātānaṃ yena vā tena vā palāyetha so passeyya mahantaṃ udakaṇṇavaṃ orimaṃ tīraṃ sāsaṅkaṃ sappaṭibhayaṃ pārimaṃ tīraṃ khemaṃ appaṭibhayaṃ natthassa nāvā santāraṇī uttarasetu vā apārā pāraṃ gamanāya.

[314] Atha kho bhikkhave tassa purisassa evamassa ayaṃ kho mahā udakaṇṇavo orimaṃ tīraṃ sāsaṅkaṃ sappaṭibhayaṃ pārimaṃ tīraṃ khemaṃ appaṭibhayaṃ natthassa nāvā santāraṇī uttarasetu vā apārā pāraṃ gamanāya yannūnāhaṃ tiṇakaṭṭhasākhāpalāsaṃ saṅkaḍḍhitvā kullaṃ bandhitvā taṃ kullaṃ nissāya hatthehi ca pādehi ca vāyamamāno sotthinā pāraṃ gaccheyyanti . atha kho so bhikkhave puriso tiṇakaṭṭhasākhāpalāsaṃ saṅkaḍḍhitvā kullaṃ bandhitvā taṃ kullaṃ nissāya hatthehi ca pādehi ca vāyamamāno sotthinā pāraṃ gaccheyya tiṇṇo pāragato thale tiṭṭhati brāhmaṇo.

[315] Upamā kho myāyaṃ bhikkhave katā atthassa viññāpanāya ayañcettha attho cattāro āsīvisā uggatejā ghoravisāti kho bhikkhave catunnetaṃ mahābhūtānaṃ adhivacanaṃ paṭhavīdhātuyā āpodhātuyā tejodhātuyā vāyodhātuyā . pañca vadhakā paccatthikāti kho bhikkhave pañcannetaṃ upādānakkhandhānaṃ adhivacanaṃ . seyyathīdaṃ . Rūpūpādānakkhandhassa vedanūpādānakkhandhassa saññūpādānakkhandhassa saṅkhārūpādānakkhandhassa viññāṇūpādānakkhandhassa . chaṭṭho antaracaro vadhako ukkhittāsikoti kho bhikkhave nandirāgassetaṃ adhivacanaṃ . suññagāmoti kho bhikkhave channetaṃ ajjhattikānaṃ āyatanānaṃ adhivacanaṃ.

[316] Cakkhuto cepi naṃ bhikkhave paṇḍito byatto medhāvī upaparikkhati rittakaṃyeva khāyati tucchakaṃyeva khāyati suññakaṃyeva Khāyati . sotato cepi naṃ bhikkhave paṇḍito byatto medhāvī upaparikkhati rittakaṃyeva khāyati tucchakaṃyeva khāyati suññakaṃyeva khāyati . ghānato cepi naṃ bhikkhave paṇḍito byatto medhāvī upaparikkhati rittakaṃyeva khāyati tucchakaṃyeva khāyati suññakaṃ yeva khāyati . jivhāto cepi naṃ bhikkhave. Kāyato cepi naṃ bhikkhave. Manato cepi naṃ bhikkhave paṇḍito byatto medhāvī upaparikkhati rittakaṃyeva khāyati tucchakaṃyeva khāyati suññakaṃyeva khāyati. {316.1} Corā gāmaghātāti kho bhikkhave channetaṃ bāhirānaṃ āyatanānaṃ adhivacanaṃ . cakkhuṃ bhikkhave haññati manāpāmanāpesu rūpesu . sotaṃ bhikkhave .pe. ghānaṃ bhikkhave .pe. jivhā bhikkhave haññati manāpāmanāpesu rasesu . kāyo bhikkhave .pe. mano bhikkhave haññati manāpāmanāpesu dhammesu . mahāudakaṇṇavoti kho bhikkhave catunnetaṃ oghānaṃ adhivacanaṃ kāmoghassa bhavoghassa diṭṭhoghassa avijjoghassa . orimaṃ tīraṃ sāsaṅkaṃ sappaṭibhayanti kho bhikkhave sakkāyassetaṃ adhivacanaṃ . pārimaṃ tīraṃ khemaṃ appaṭibhayanti kho bhikkhave nibbānassetaṃ adhivacanaṃ . kullanti kho bhikkhave ariyassetaṃ aṭṭhaṅgikassa maggassa adhivacanaṃ . seyyathīdaṃ . sammādiṭṭhi .pe. Sammāsamādhi . hatthehi ca pādehi ca vāyamamānoti kho bhikkhave viriyārambhassetaṃ adhivacanaṃ . tiṇṇo pāragato thale tiṭṭhati brāhmaṇoti kho bhikkhave arahato etaṃ adhivacananti. Paṭhamaṃ.