[319] Kathañca bhikkhave bhikkhu jāgariyaṃ anuyutto hoti . idha bhikkhave bhikkhu divasaṃ caṅkamena nisajjāya āvaraṇīyehi dhammehi cittaṃ parisodheti rattiyā paṭhamaṃ yāmaṃ caṅkamena nisajjāya āvaraṇīyehi dhammehi cittaṃ parisodheti rattiyā majjhimaṃ yāmaṃ dakkhiṇena passena Sīhaseyyaṃ kappeti pādena pādaṃ accādhāya sato sampajāno uṭṭhānasaññaṃ manasikaritvā rattiyā pacchimaṃ yāmaṃ paccuṭṭhāya caṅkamena nisajjāya āvaraṇīyehi dhammehi cittaṃ parisodheti . Evaṃ kho bhikkhave bhikkhu jāgariyamanuyutto hoti. Imehi [1]- bhikkhave tīhi dhammehi samannāgato bhikkhu diṭṭhe va dhamme sukhasomanassabahulo viharati yoni cassa āraddhā hoti āsavānaṃ khayāyāti. Dutiyaṃ.