[349] Kathañca bhikkhave saṃvaro hoti . idha bhikkhave bhikkhu Cakkhunā rūpaṃ disvā piyarūpe rūpe nādhimuccati appiyarūpe rūpe na byāpajjati upaṭṭhitakāyasati ca viharati appamāṇacetaso tañca cetovimuttiṃ paññāvimuttiṃ yathābhūtaṃ pajānāti yatthassa te uppannā pāpakā akusalā dhammā aparisesā nirujjhanti . sotena saddaṃ sutvā .pe. ghānena gandhaṃ ghāyitvā .pe. jivhāya rasaṃ sāyitvā .pe. kāyena phoṭṭhabbaṃ phusitvā .pe. manasā dhammaṃ viññāya piyarūpe dhamme nādhimuccati appiyarūpe dhamme na byāpajjati upaṭṭhitakāyasati ca viharati appamāṇacetaso tañca cetovimuttiṃ paññāvimuttiṃ yathābhūtaṃ pajānāti yatthassa te uppannā pāpakā akusalā dhammā aparisesā nirujjhanti.

[350] Seyyathāpi bhikkhave puriso chappāṇake gahetvā nānāvisaye nānāgocare daḷhāya rajjuyā bandheyya ahiṃ gahetvā .pe. Suṃsumāraṃ gahetvā .pe. kukkuraṃ gahetvā . sigālaṃ gahetvā . Makkaṭaṃ gahetvā daḷhāya rajjuyā bandheyya daḷhāya rajjuyā bandhitvā daḷhe khīle vā thambhe vā upanibandheyya . atha kho te bhikkhave chappāṇakā nānāvisayā nānāgocarā sakaṃ sakaṃ gocaravisayaṃ āviñcheyyuṃ . ahi āviñcheyya vammikaṃ pavekkhāmīti . suṃsumāro āviñcheyya udakaṃ pavekkhāmīti . pakkhī āviñcheyya ākāsaṃ ḍessāmīti . kukkuro āviñcheyya gāmaṃ pavekkhāmīti . sigālo āviñcheyya sīvathikaṃ pavekkhāmīti . makkaṭo āviñcheyya vanaṃ Pavekkhāmīti . yadā kho te bhikkhave chappāṇakājjhattā assu kilantā atha tameva khīlaṃ vā thambhaṃ vā upatiṭṭheyyuṃ upanisīdeyyuṃ upanipajjeyyuṃ . evameva kho bhikkhave yassa kassaci bhikkhuno kāyagatāsati bhāvitā bahulīkatā taṃ cakkhu nāviñchati manāpiyesu rūpesu amanāpiyā rūpā na paṭikūlā honti .pe. jivhā nāviñchati .pe. mano nāviñchati manāpiyesu dhammesu amanāpiyā dhammā na paṭikūlā honti . evaṃ kho bhikkhave saṃvaro hoti . Daḷhe khīle vā thambhe vāti kho bhikkhave kāyagatāsatiyā etaṃ adhivacanaṃ . tasmātiha [3]- bhikkhave evaṃ sikkhitabbaṃ kāyagatā no sati bhāvitā bhavissati bahulīkatā yānīkatā vatthukatā anuṭṭhitā paricitā susamāraddhāti. Evaṃ hi vo bhikkhave sikkhitabbanti. Dasamaṃ.