[351] Seyyathāpi bhikkhave yavakalāpi cātummahāpathe nikkhittā assa atha cha purisā āgaccheyyuṃ byābhaṅgihatthā te yena yavakalāpiṃ chahi byābhaṅgīhi haneyyuṃ evaṃ hi sā bhikkhave yavakalāpi suhatā assa chahi byābhaṅgīhi haññamānā atha sattamo puriso āgaccheyya byābhaṅgihattho so taṃ yavakalāpiṃ sattamāya byābhaṅgiyā haneyya evaṃ hi sā bhikkhave yavakalāpi suhatatarā assa sattamāya byābhaṅgiyā haññamānā . evameva kho bhikkhave assutvā puthujjano cakkhusmiṃ haññati manāpāmanāpehi rūpehi .pe. jivhāya haññati manāpāmanāpehi rasehi .pe. manasmiṃ Haññati manāpāmanāpehi dhammehi . sace so bhikkhave assutavā puthujjano āyatiṃ punabbhavāya ceteti . evaṃ hi so bhikkhave moghapuriso suhatataro hoti seyyathāpi [1]- sā yavakalāpi sattamāya byābhaṅgiyā haññamānāti. Ekādasamaṃ.

[352] Bhūtapubbaṃ bhikkhave devāsurasaṅgāmo samupabyūḷho ahosi. Atha kho bhikkhave vepacitti asurindo asure āmantesi sace mārisā devāsurasaṅgāme samupabyūḷhe asurā jineyyuṃ devā parājineyyuṃ yena naṃ sakkaṃ devānamindaṃ kaṇṭhapañcamehi bandhanehi bandhitvā mama santike āneyyātha asurapuranti . sakkopi kho bhikkhave devānamindo deve tāvatiṃse āmantesi sace mārisā devāsurasaṅgāme samupabyūḷhe devā jineyyuṃ asurā parājineyyuṃ yena naṃ vepacittiasurindaṃ kaṇṭhapañcamehi bandhanehi bandhitvā mama santike āneyyātha sudhammaṃ devasabhanti . tasmiṃ kho pana bhikkhave saṅgāme devā jiniṃsu . [2]- atha kho bhikkhave devā tāvatiṃsā vepacittiasurindaṃ kaṇṭhapañcamehi bandhanehi bandhitvā sakkassa devānamindassa santike ānesuṃ sudhammaṃ devasabhaṃ.

[353] Tatra sudaṃ bhikkhave vepacitti asurindo kaṇṭhapañcamehi bandhanehi bandho hoti . yadā ca kho bhikkhave vepacittissa asurindassa evaṃ hoti dhammikā kho devā adhammikā asurā Idānāhaṃ devapuraṃ gacchāmīti . atha kaṇṭhapañcamehi bandhanehi muttaṃ attānaṃ samanupassati dibbehi ca pañcahi kāmaguṇehi samappito samaṅgībhūto paricāreti . yadā ca kho bhikkhave vepacittissa asurindassa evaṃ hoti dhammikā kho asurā adhammikā devā tatthevadānāhaṃ asurapuraṃ gamissāmīti . atha kaṇṭhapañcamehi bandhanehi bandhaṃ attānaṃ samanupassati dibbehi ca pañcahi kāmaguṇehi parihāyati . evaṃ sukhumaṃ kho bhikkhave vepacittibandhanaṃ tato sukhumataraṃ mārabandhanaṃ . maññamāno kho bhikkhave bandho mārassa amaññamāno mutto pāpimato.