[354] Asmīti bhikkhave maññitametaṃ ayamahamasmīti maññitametaṃ bhavissanti maññitametaṃ na bhavissanti maññitametaṃ rūpī bhavissanti maññitametaṃ arūpī bhavissanti maññitametaṃ saññī bhavissanti maññitametaṃ asaññī bhavissanti maññitametaṃ nevasaññināsaññī bhavissanti maññitametaṃ . maññitaṃ bhikkhave rogo maññitaṃ gaṇḍo maññitaṃ sallaṃ tasmātiha bhikkhave amaññamānena cetasā viharissāmīti . Evañhi vo bhikkhave sikkhitabbaṃ.

[355] Asmīti bhikkhave iñjitametaṃ ayamahamasmīti iñjitametaṃ bhavissanti iñjitametaṃ na bhavissanti iñjitametaṃ rūpī bhavissanti iñjitametaṃ arūpī bhavissanti iñjitametaṃ saññī bhavissanti iñjitametaṃ asaññī bhavissanti iñjitametaṃ nevasaññināsaññī Bhavissanti iñjitametaṃ . iñjitaṃ bhikkhave rogo iñjitaṃ gaṇḍo iñjitaṃ sallaṃ tasmātiha bhikkhave aniñjiyamānena cetasā viharissāmāti. Evañhi vo bhikkhave sikkhitabbaṃ.

[356] Asmīti bhikkhave phanditametaṃ ayamahamasmīti phanditametaṃ bhavissanti .pe. na bhavissanti . rūpī bhavissanti . arūpī bhavissanti. Saññī bhavissanti . asaññī bhavissanti . nevasaññināsaññī bhavissanti phanditametaṃ . phanditaṃ bhikkhave rogo phanditaṃ gaṇḍo phanditaṃ sallaṃ . Tasmātiha bhikkhave aphandiyamānena cetasā viharissāmāti. Evañhi vo bhikkhave sikkhitabbaṃ.

[357] Asmīti bhikkhave papañcitametaṃ ayamahamasmīti papañcitametaṃ bhavissanti .pe. na bhavissanti . rūpī bhavissanti . arūpī bhavissanti. Saññī bhavissanti . asaññī bhavissanti . nevasaññināsaññī bhavissanti papañcitametaṃ . papañcitaṃ bhikkhave rogo papañcitaṃ gaṇḍo papañcitaṃ sallaṃ . tasmātiha bhikkhave nippapañcena cetasā viharissāmāti. Evañhi vo bhikkhave sikkhitabbaṃ.