[391] Atha kho aññataro bhikkhu yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho so bhikkhu bhagavantaṃ etadavoca idha mayhaṃ bhante rahogatassa paṭisallīnassa evaṃ cetaso parivitakko udapādi tisso vedanā vuttā bhagavatā sukhā vedanā dukkhā vedanā adukkhamasukhā vedanā imā tisso vedanā vuttā bhagavatā . vuttaṃ kho panetaṃ bhagavatā yaṅkiñci vedayitaṃ taṃ dukkhasminti kiṃ nu kho etaṃ bhagavatā sandhāya bhāsitaṃ yaṅkiñci vedayitaṃ taṃ dukkhasminti. {391.1} Sādhu sādhu bhikkhu tisso imā bhikkhu vedanā vuttā mayā sukhā vedanā dukkhā vedanā adukkhamasukhā vedanā imā tisso vedanā vuttā mayā . vuttaṃ kho panetaṃ bhikkhu mayā yaṅkiñci vedayitaṃ taṃ dukkhasminti taṃ kho panetaṃ bhikkhu mayā saṅkhārānaṃyeva aniccataṃ sandhāya bhāsitaṃ yaṅkiñci vedayitaṃ taṃ dukkhasminti . taṃ kho panetaṃ bhikkhu mayā saṅkhārānaṃyeva khayadhammataṃ vayadhammataṃ virāgadhammataṃ nirodhadhammataṃ vipariṇāmadhammataṃ sandhāya bhāsitaṃ yaṅkiñci vedayitaṃ taṃ dukkhasminti.

[392] Atha kho pana bhikkhu mayā anupubbasaṅkhārānaṃ nirodho akkhāto paṭhamajjhānaṃ samāpannassa vācā niruddhā hoti dutiyajjhānaṃ Samāpannassa vitakkavicārā niruddhā honti tatiyajjhānaṃ samāpannassa pīti niruddhā hoti catutthajjhānaṃ samāpannassa assāsapassāsā niruddhā honti ākāsānañcāyatanaṃ samāpannassa rūpasaññā niruddhā hoti viññāṇañcāyatanaṃ samāpannassa ākāsānañcāyatanasaññā niruddhā hoti ākiñcaññāyatanaṃ samāpannassa viññāṇañcāyatanasaññā niruddhā hoti nevasaññānāsaññāyatanaṃ samāpannassa ākiñcaññāyatanasaññā niruddhā hoti saññāvedayitanirodhaṃ samāpannassa saññā ca vedanā ca niruddhā honti. Khīṇāsavassa bhikkhuno rāgo niruddho hoti doso niruddho hoti moho niruddho hoti.

[393] Atha kho bhikkhu mayā anupubbasaṅkhārānaṃ vūpasamo akkhāto paṭhamajjhānaṃ samāpannassa vācā vūpasantā hoti dutiyajjhānaṃ samāpannassa vitakkavicārā vūpasantā honti .pe. saññāvedayitanirodhaṃ samāpannassa saññā ca vedanā ca vūpasantā honti. Khīṇāsavassa bhikkhu rāgo vūpasanto hoti doso vūpasanto hoti moho vūpasanto hoti.