[493] Pañcimāni bhikkhave ṭhānāni dullabhāni akatapuññena mātugāmena . katamāni pañca . paṭirūpe kule jāyeyyanti idaṃ bhikkhave paṭhamaṃ ṭhānaṃ dullabhaṃ akatapuññena mātugāmena . paṭirūpe kule jāyitvā paṭirūpaṃ kulaṃ gaccheyyanti idampi bhikkhave dutiyaṃ ṭhānaṃ dullabhaṃ akatapuññena mātugāmena . paṭirūpe kule jāyitvā paṭirūpaṃ kulaṃ gantvā asapatti agāraṃ ajjhāvaseyyanti idampi bhikkhave tatiyaṃ ṭhānaṃ dullabhaṃ akatapuññena mātugāmena . paṭirūpe kule jāyitvā paṭirūpaṃ kulaṃ gantvā asapatti agāraṃ ajjhāvasantī puttavatī assanti idampi bhikkhave catutthaṃ ṭhānaṃ dullabhaṃ akatapuññena mātugāmena . paṭirūpe kule jāyitvā paṭirūpaṃ kulaṃ gantvā asapatti agāraṃ ajjhāvasantī puttavatī samānā sāmikaṃ abhibhuyya vatteyyanti idampi bhikkhave pañcamaṃ ṭhānaṃ dullabhaṃ akatapuññena Mātugāmena . imāni kho bhikkhave pañca ṭhānāni dullabhāni akatapuññena mātugāmena. Sattamaṃ.

[494] Pañcimāni bhikkhave ṭhānāni sulabhāni katapuññena mātugāmena . katamāni pañca . paṭirūpe kule jāyeyyanti idampi bhikkhave paṭhamaṃ ṭhānaṃ sulabhaṃ katapuññena mātugāmena . Paṭirūpe kule jāyitvā paṭirūpaṃ kulaṃ gaccheyyanti idampi bhikkhave dutiyaṃ ṭhānaṃ sulabhaṃ katapuññena mātugāmena . paṭirūpe kule jāyitvā paṭirūpaṃ kulaṃ gantvā asapatti agāraṃ ajjhāvaseyyanti idampi bhikkhave tatiyaṃ ṭhānaṃ sulabhaṃ katapuññena mātugāmena . Paṭirūpe kule jāyitvā paṭirūpaṃ kulaṃ gantvā asapatti agāraṃ ajjhāvasantī puttavatī assanti idampi bhikkhave catutthaṃ ṭhānaṃ sulabhaṃ katapuññena mātugāmena . paṭirūpe kule jāyitvā paṭirūpaṃ kulaṃ gantvā asapatti agāraṃ ajjhāvasantī puttavatī samānā sāmikaṃ abhibhuyya vatteyyanti idampi bhikkhave pañcamaṃ ṭhānaṃ sulabhaṃ katapuññena mātugāmena . imāni kho bhikkhave pañca ṭhānāni sulabhāni katapuññena mātugāmenāti. Aṭṭhamaṃ.