[513] Ekaṃ samayaṃ āyasmā sārīputto vajjīsu viharati ukkacelāyaṃ gaṅgāya nadiyā tīre . athakho sāmaṇḍako paribbājako yenāyasmā sārīputto tenupasaṅkami upasaṅkamitvā āyasmatā sārīputtena saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . Ekamantaṃ nisinno kho sāmaṇḍako paribbājako āyasmantaṃ sārīputtaṃ etadavoca nibbānaṃ nibbānanti āvuso sārīputta vuccati katamaṃ nu kho āvuso nibbānanti. {513.1} Yo kho āvuso rāgakkhayo dosakkhayo mohakkhayo idaṃ vuccati nibbānanti . atthi panāvuso maggo atthi paṭipadā etassa nibbānassa sacchikiriyāyāti . atthi kho āvuso maggo atthi paṭipadā etassa nibbānassa sacchikiriyāyāti . Katamo panāvuso maggo katamā paṭipadā etassa nibbānassa sacchikiriyāyāti . ayameva kho āvuso ariyo aṭṭhaṅgiko maggo etassa nibbānassa sacchikiriyāya . seyyathīdaṃ . sammādiṭṭhi .pe. sammāsamādhi . ayaṃ kho āvuso maggo ayaṃ paṭipadā etassa nibbānassa sacchikiriyāyāti . bhaddako āvuso maggo bhaddikā paṭipadā etassa nibbānassa sacchikiriyāya alañca panāvuso sārīputta appamādāyāti .pe.

[514] Kiṃ nu kho āvuso sārīputta imasmiṃ dhammavinaye Dukkaranti . pabbajjā kho āvuso imasmiṃ dhammavinaye dukkaranti . Pabbajitena panāvuso kiṃ dukkaranti . pabbajitena kho āvuso abhirati dukkarāti . abhiratena panāvuso kiṃ dukkaranti . abhiratena kho āvuso dhammānudhammapaṭipatti dukkarāti . kīvaciraṃ panāvuso dhammānudhammapaṭipanno bhikkhu arahaṃ assāti. Na ciraṃ āvusoti. Sāmaṇḍakasaṃyuttaṃ samattaṃ. Purimasuttasadisaṃ uddānaṃ. -------