[517] Tatiyajjhānaṃ tatiyajjhānanti vuccati katamaṃ nu kho tatiyajjhānanti . tassa mayhaṃ āvuso etadahosi idha bhikkhu pītiyā ca virāgā upekkhako ca viharati sato ca sampajāno sukhañca kāyena paṭisaṃvedeti yantaṃ ariyā ācikkhanti upekkhako satimā sukhavihārīti tatiyajjhānaṃ upasampajja viharati idaṃ vuccati tatiyajjhānanti . so khvāhaṃ āvuso pītiyā ca virāgā upekkhako ca viharāmi sato ca sampajāno sukhañca kāyena paṭisaṃvedemi yantaṃ ariyā ācikkhanti upekkhako satimā sukhavihārīti tatiyajjhānaṃ upasampajja viharāmi . tassa mayhaṃ āvuso iminā vihārena viharato pītisahagatā saññāmanasikārā samudācaranti. {517.1} Atha kho maṃ āvuso bhagavā iddhiyā upasaṅkamitvā etadavoca moggallāna moggallāna mā brāhmaṇa tatiyajjhānaṃ pamādo tatiyajjhāne cittaṃ saṇṭhapehi tatiyajjhāne cittaṃ ekodiṃ karohi tatiyajjhāne cittaṃ samādahāti . so khvāhaṃ āvuso aparena samayena pītiyā ca virāgā upekkhako ca viharāmi sato ca sampajāno sukhañca kāyena paṭisaṃvedemi yantaṃ ariyā ācikkhanti upekkhako satimā sukhavihārīti tatiyajjhānaṃ upasampajja vihāsiṃ . yaṃ hi taṃ āvuso sammā vadamāno vadeyya .pe. Mahābhiññataṃ pattoti.
[518] Catutthajjhānaṃ catutthajjhānanti vuccati katamaṃ nu kho catutthajjhānanti . tassa mayhaṃ āvuso etadahosi idha bhikkhu sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthajjhānaṃ upasampajja viharati idaṃ vuccati catutthajjhānanti . so khvāhaṃ āvuso sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthajjhānaṃ upasampajja viharāmi . tassa mayhaṃ āvuso iminā vihārena viharato sukhasahagatā saññāmanasikārā samudācaranti. {518.1} Atha kho maṃ āvuso bhagavā iddhiyā upasaṅkamitvā etadavoca moggallāna moggallāna mā brāhmaṇa catutthajjhānaṃ pamādo catutthajjhāne cittaṃ saṇṭhapehi catutthajjhāne cittaṃ ekodiṃ karohi catutthajjhāne cittaṃ samādahāti . so khvāhaṃ āvuso aparena samayena sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthajjhānaṃ upasampajja vihāsiṃ . yaṃ hi taṃ āvuso sammā vadamāno vadeyya .pe. Mahābhiññataṃ pattoti.