[537] Ekaṃ samayaṃ sambahulā therā bhikkhū macchikāsaṇḍe viharanti ambāṭakavane . tena kho pana samayena sambahulānaṃ therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi saññojananti vā āvuso saññojaniyā dhammāti vā ime dhammā nānatthā nānābyañjanā udāhu ekatthā byañjanameva nānanti . tatrekaccehi therehi bhikkhūhi evaṃ byākataṃ hoti saññojananti vā āvuso saññojaniyā dhammāti vā ime dhammā nānatthā ceva nānābyañjanā cāti . Ekaccehi therehi bhikkhūhi evaṃ byākataṃ hoti saññojananti vā āvuso saññojaniyā dhammāti vā ime dhammā ekatthā byañjanameva nānanti.

[538] Tena kho pana samayena citto gahapati migapathakaṃ anuppatto hoti kenacideva karaṇīyena . assosi kho citto gahapati sambahulānaṃ kira therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi saññojananti vā āvuso saññojaniyā dhammāti vā ime dhammā nānatthā nānābyañjanā udāhu ekatthā byañjanameva nānanti . Tatrekaccehi therehi bhikkhūhi evaṃ byākataṃ saññojananti vā Āvuso saññojaniyā dhammāti vā ime dhammā nānatthā ceva nānābyañjanā cāti . ekaccehi therehi bhikkhūhi evaṃ byākataṃ saññojananti vā āvuso saññojaniyā dhammāti vā ime dhammā ekatthā byañjanameva nānanti.

[539] Atha kho citto gahapati yena therā bhikkhū tenupasaṅkami upasaṅkamitvā there bhikkhū abhivādetvā ekamantaṃ nisīdi . ekamantaṃ nisinno kho citto gahapati there bhikkhū etadavoca sutametaṃ bhante sambahulānaṃ kira therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi saññojananti vā āvuso saññojaniyā dhammāti vā ime dhammā nānatthā nānābyañjanā udāhu ekatthā byañjanameva nānanti . Ekaccehi therehi bhikkhūhi evaṃ byākataṃ saññojananti vā āvuso saññojaniyā dhammāti vā ime dhammā nānatthā ceva nānābyañjanā cāti . ekaccehi therehi bhikkhūhi evaṃ byākataṃ saññojananti vā āvuso saññojaniyā dhammāti vā ime dhammā ekatthā byañjanameva nānanti . evaṃ gahapatīti . saññojananti vā bhante saññojaniyā dhammāti vā ime dhammā nānatthā ceva nānābyañjanā ca . Tenahi bhante upamaṃ karissāmi . upamāyapidhekacce viññū purisā bhāsitassa atthaṃ ājānanti.