[589] Ekaṃ samayaṃ bhagavā rājagahe viharati veḷuvane kalandakanivāpe. Atha kho tālaputto naṭagāmaṇī yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho tālaputto naṭagāmaṇī bhagavantaṃ etadavoca sutaṃ metaṃ bhante pubbakānaṃ ācariyapācariyānaṃ naṭānaṃ bhāsamānānaṃ yo so naṭo raṅgamajjhe samajjamajjhe saccālikena janaṃ hāseti rameti So kāyassa bhedā paraṃ maraṇā pahāsānaṃ devānaṃ sahabyataṃ upapajjatīti . idha bhagavā kimāhāti . alaṃ gāmaṇi tiṭṭhatetaṃ mā maṃ etaṃ pucchīti.

[590] Dutiyampi kho tālaputto naṭagāmaṇī bhagavantaṃ etadavoca sutammetaṃ bhante pubbakānaṃ ācariyapācariyānaṃ naṭānaṃ bhāsamānānaṃ yo so naṭo raṅgamajjhe samajjamajjhe saccālikena janaṃ hāseti rameti so kāyassa bhedā paraṃ maraṇā pahāsānaṃ devānaṃ sahabyataṃ upapajjatīti . idha bhagavā kimāhāti . alaṃ gāmaṇi tiṭṭhatetaṃ mā maṃ etaṃ pucchīti . tatiyampi kho tālaputto naṭagāmaṇī bhagavantaṃ etadavoca sutammetaṃ bhante pubbakānaṃ ācariyapācariyānaṃ naṭānaṃ bhāsamānānaṃ yo so naṭo raṅgamajjhe samajjamajjhe saccālikena janaṃ hāseti rameti so kāyassa bhedā paraṃ maraṇā pahāsānaṃ devānaṃ sahabyataṃ upapajjatīti. Idha bhagavā kimāhāti.

[591] Addhā kho tyāhaṃ gāmaṇi nālatthaṃ alaṃ gāmaṇi tiṭṭhatetaṃ mā maṃ etaṃ pucchīti . apica tyāhaṃ byākarissāmi. Pubbe kho gāmaṇi sattā avītarāgā rāgabandhanabandhā tesaṃ naṭo raṅgamajjhe samajjamajjhe ye dhammā rajaniyā te upasaṃharati bhiyyo sarāgāya . Pubbe kho gāmaṇi sattā avītadosā dosabandhanabandhā tesaṃ naṭo raṅgamajjhe samajjamajjhe ye dhammā dosaniyā Te upasaṃharati bhiyyo sadosāya . pubbe kho gāmaṇi sattā avītamohā mohabandhanabandhā tesaṃ naṭo raṅgamajjhe samajjamajjhe ye dhammā mohaniyā te upasaṃharati bhiyyo samohāya . so attanā matto pamatto pamāde ṭhatvā kāyassa bhedā paraṃ maraṇā pahāso nāma nirayo tattha upapajjati . sace kho panassa evaṃ diṭṭhi hoti yo so naṭo raṅgamajjhe samajjamajjhe saccālikena janaṃ hāseti rameti so kāyassa bhedā paraṃ maraṇā pahāsānaṃ devānaṃ sahabyataṃ upapajjatīti . sāssa ca hoti micchādiṭṭhi micchādiṭṭhikassa kho panāhaṃ gāmaṇi purisapuggalassa dvinnaṃ gatīnaṃ aññataraṃ gatiṃ vadāmi nirayaṃ vā tiracchānayoniṃ vāti.