[605] Taṃ kissa hetu . appevanāma ekapadampi ājāneyyuṃ taṃ nesaṃ assa dīgharattaṃ hitāya sukhāya . seyyathāpi gāmaṇi purisassa tayo udakamaṇikā eko udakamaṇiko acchiddo ahāriaparihārī eko udakamaṇiko acchiddo hāriparihārī eko udakamaṇiko chiddo hāriparihārī . taṃ kiṃ maññasi gāmaṇi asu puriso udakaṃ nikkhipitukāmo tattha paṭhamaṃ nikkhipeyya yo vā so udakamaṇiko acchiddo ahāriaparihārī yo vā so udakamaṇiko acchiddo hāriparihārī yo vā so udakamaṇiko chiddo hāriparihārī . asu bhante puriso udakaṃ nikkhipitukāmo yo so udakamaṇiko acchiddo ahāriaparihārī tattha nikkhipeyya tattha nikkhipitvā yo so udakamaṇiko acchiddo hāriparihārī tattha nikkhipeyya tattha nikkhipitvā yo so udakamaṇiko chiddo hāriparihārī tattha nikkhipeyyapi nopi nikkhipeyya . taṃ kissa hetu. Antamaso bhaṇḍadhovanaṃpi bhavissatīti.

[606] Seyyathāpi gāmaṇi yo so udakamaṇiko acchiddo ahāriaparihārī evameva mayhaṃ bhikkhu bhikkhuniyo tesāhaṃ dhammaṃ desemi ādikalyāṇaṃ majjhekalyāṇaṃ pariyosānakalyāṇaṃ sātthaṃ Sabyañjanaṃ kevalaparipuṇṇaṃ parisuddhaṃ brahmacariyaṃ pakāsemi . taṃ kissa hetu . ete hi gāmaṇi maṃdīpā maṃleṇā maṃtāṇā maṃsaraṇā viharanti . seyyathāpi gāmaṇi yo so udakamaṇiko acchiddo hāriparihārī evameva mayhaṃ upāsakā upāsikāyo tesaṃ ahaṃ dhammaṃ desemi ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsemi . taṃ kissa hetu . ete hi gāmaṇi maṃdīpā maṃleṇā maṃtāṇā maṃsaraṇā viharanti . seyyathāpi gāmaṇi yo so udakamaṇiko chiddo hāriparihārī evameva mayhaṃ aññatitthiyā samaṇabrāhmaṇaparibbājakā tesaṃ ahaṃ dhammaṃ desemi ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāsemi . Taṃ kissa hetu . appevanāma ekapadampi ājāneyyuṃ taṃ nesaṃ assa dīgharattaṃ hitāya sukhāyāti.