[623] Ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena rājantepure rājaparisāya sannisinnānaṃ sannipatitānaṃ ayamantarākathā udapādi kappati samaṇānaṃ sakyaputtiyānaṃ jātarūparajataṃ sādiyanti samaṇā sakyaputtiyā jātarūparajataṃ paṭiggaṇhanti samaṇā sakyaputtiyā jātarūparajatanti.

[624] Tena kho pana samayena maṇicūḷako gāmaṇī tassaṃ parisāyaṃ nisinno hoti . atha kho maṇicūḷako gāmaṇī taṃ parisaṃ etadavoca mā ayyā evaṃ avacuttha na kappati samaṇānaṃ sakyaputtiyānaṃ jātarūparajataṃ na sādiyanti samaṇā sakyaputtiyā jātarūparajataṃ na paṭiggaṇhanti samaṇā sakyaputtiyā jātarūparajataṃ nikkhittamaṇisuvaṇṇā samaṇā sakyaputtiyā apetajātarūparajatāti . Asakkhi kho maṇicūḷako gāmaṇī taṃ parisaṃ saññāpetuṃ.

[625] Atha kho maṇicūḷako gāmaṇī yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho maṇicūḷako gāmaṇī bhagavantaṃ etadavoca idha bhante rājantepure rājaparisāya sannisinnānaṃ sannipatitānaṃ ayamantarākathā udapādi kappati samaṇānaṃ sakyaputtiyānaṃ jātarūparajataṃ sādiyanti Samaṇā sakyaputtiyā jātarūparajataṃ paṭiggaṇhanti samaṇā sakyaputtiyā jātarūparajatanti . evaṃ vutte ahaṃ bhante taṃ parisaṃ etadavocaṃ mā ayyā evaṃ avacuttha na kappati samaṇānaṃ sakyaputtiyānaṃ jātarūparajataṃ na sādiyanti samaṇā sakyaputtiyā jātarūparajataṃ na paṭiggaṇhanti samaṇā sakyaputtiyā jātarūparajataṃ nikkhittamaṇisuvaṇṇā samaṇā sakyaputtiyā apetajātarūparajatāti . Asakkhiṃ khohaṃ bhante taṃ parisaṃ saññāpetuṃ . kaccāhaṃ bhante evaṃ byākaramāno vuttavādī ceva bhagavato homi na ca bhagavantaṃ abhūtena abbhācikkhāmi dhammassa cānudhammaṃ byākaromi na ca koci sahadhammiko vādānupāto gārayhaṃ ṭhānaṃ āgacchatīti.

[626] Taggha tvaṃ gāmaṇi evaṃ byākaramāno vuttavādī ceva me ahosi na ca maṃ abhūtena abbhācikkhasi dhammassa cānudhammaṃ byākarosi na ca koci sahadhammiko vādānupāto gārayhaṃ ṭhānaṃ āgacchati . na hi gāmaṇi kappati samaṇānaṃ sakyaputtiyānaṃ jātarūparajataṃ na sādiyanti samaṇā sakyaputtiyā jātarūparajataṃ na paṭiggaṇhanti samaṇā sakyaputtiyā jātarūparajataṃ nikkhittamaṇisuvaṇṇā samaṇā sakyaputtiyā apetajātarūparajatā . Yassa kho gāmaṇi jātarūparajataṃ kappati pañcapi tassa kāmaguṇā kappanti yassa pañca kāmaguṇā kappanti tassapi jātarūparajataṃ kappati Ekaṃsenetaṃ gāmaṇi dhāreyyāsi assamaṇadhammo asakyaputtiyadhammoti . Api cāhaṃ gāmaṇi evaṃ vadāmi tiṇaṃ tiṇatthikena pariyesitabbaṃ dāruṃ dārutthikena pariyesitabbaṃ sakaṭaṃ sakaṭatthikena pariyesitabbaṃ puriso purisatthikena pariyesitabbo . na tvevāhaṃ gāmaṇi kenaci pariyāyena jātarūparajataṃ sāditabbaṃ pariyesitabbanti vadāmīti. Dasamaṃ.