[649] Ekaṃ samayaṃ bhagavā koḷiyesu viharati uttarannāma koḷiyānaṃ nigamo . atha kho pāṭaliyo gāmaṇī yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho pāṭaliyo gāmaṇī bhagavantaṃ etadavoca sutammetaṃ bhante samaṇo gotamo māyaṃ jānātīti . ye te bhante evamāhaṃsu samaṇo gotamo māyaṃ jānātīti . kacci te bhante bhagavato vuttavādino na ca bhagavantaṃ abhūtena abbhācikkhanti dhammassa cānudhammaṃ byākaronti na ca koci sahadhammiko vādānupāto Gārayhaṃ ṭhānaṃ āgacchati . anabbhakkhātukāmā hi mayaṃ bhante bhagavantanti . ye te gāmaṇi evamāhaṃsu samaṇo gotamo māyaṃ jānātīti . vuttavādino ceva me te na ca maṃ abhūtena abbhācikkhanti dhammassa cānudhammaṃ byākaronti na ca koci sahadhammiko vādānupāto gārayhaṃ ṭhānaṃ āgacchatīti . saccaṃyeva kira bho mayaṃ tesaṃ samaṇabrāhmaṇānaṃ na saddahāma samaṇo gotamo māyaṃ jānātīti . samaṇo khalu bho gotamo māyāvīti . yo nu kho gāmaṇi evaṃ vadeti ahaṃ māyaṃ jānāmīti . so evaṃ vadeti ahaṃ māyāvīti. Tatheva taṃ bhagavā hoti tatheva taṃ sugata hotīti . tenahi gāmaṇi taññevettha paṭipucchissāmi. Yathā te khameyya tathā taṃ byākareyyāsi.

[650] Taṃ kiṃ maññasi gāmaṇi jānāsi tvaṃ koḷiyānaṃ lambacūḷake bhaṭeti . jānāmahaṃ bhante koḷiyānaṃ lambacūḷake bhaṭeti . taṃ kiṃ maññasi gāmaṇi kimatthiyā koḷiyānaṃ lambacūḷakā bhaṭāti . ye ca bhante koḷiyānaṃ corā te ca paṭisedhetuṃ yāni ca koḷiyānaṃ dūteyyāni tāni ca pahātuṃ etadatthiyā bhante koḷiyānaṃ lambacūḷakā bhaṭāti. {650.1} Taṃ kiṃ maññasi gāmaṇi jānāsi tvaṃ koḷiyānaṃ nigame lambacūḷake bhaṭe sīlavanto vā te dussīlā vāti . Jānāmahaṃ bhante koḷiyānaṃ lambacūḷake bhaṭe dussīle Pāpadhamme ye ca loke dussīlā pāpadhammā koḷiyānaṃ lambacūḷakā bhaṭā tesaṃ aññatarāti . yo nu kho gāmaṇi evaṃ vadeyya pāṭaliyo gāmaṇī jānāti koḷiyānaṃ lambacūḷake bhaṭe dussīle pāpadhamme pāṭaliyopi gāmaṇī dussīlo pāpadhammoti sammā nu kho so vadamāno vadeyyāti . no hetaṃ bhante . aññe bhante koḷiyānaṃ lambacūḷakā bhaṭā aññohamasmi aññathādhammā koḷiyānaṃ lambacūḷakā bhaṭā aññathādhammohamasmīti . tvaṃ hi nāma gāmaṇi lacchasi pāṭaliyo gāmaṇī jānāti koḷiyānaṃ lambacūḷake bhaṭe dussīle pāpadhamme na ca pāṭaliyo gāmaṇī dussīlo pāpadhammoti tasmā tathāgato na lacchati tathāgato māyaṃ jānāti na ca tathāgato māyāvīti.