[786] Siyā panāvuso aññopi pariyāyo yenetaṃ abyākataṃ bhagavatāti . siyā āvuso . taṇhārāmassa kho āvuso taṇhāratassa taṇhāsammuditassa taṇhānirodhaṃ ajānato apassato yathābhūtaṃ hoti tathāgato paraṃ maraṇātipissa hoti .pe. neva hoti na na hoti tathāgato paraṃ maraṇātipissa hoti.

[787] Na taṇhārāmassa kho āvuso na taṇhāratassa na taṇhāsammuditassa taṇhānirodhaṃ jānato passato yathābhūtaṃ hoti tathāgato paraṃ maraṇātipissa na hoti .pe. neva hoti na na hoti tathāgato paraṃ maraṇātipissa na hoti . ayaṃ kho āvuso pariyāyo yenetaṃ abyākataṃ bhagavatāti . siyā panāvuso aññopi pariyāyo yenetaṃ abyākataṃ bhagavatāti . etthadāni āvuso sārīputta ito uttariṃ kiṃ icchasi taṇhāsaṅkhayavimuttassa āvuso sārīputta bhikkhuno vattaṃ natthi paññāpanāyāti. Chaṭṭhaṃ.