[797] Aññatitthiyā kho vaccha paribbājakā rūpaṃ attato samanupassanti rūpavantaṃ vā attānaṃ attani vā rūpaṃ rūpasmiṃ vā attānaṃ . vedanaṃ attato samanupassanti .pe. saññaṃ . saṅkhāre. Viññāṇaṃ attato samanupassanti viññāṇavantaṃ vā attānaṃ attani vā viññāṇaṃ viññāṇasmiṃ vā attānaṃ . tasmā aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti sassato lokoti vā .pe. neva hoti na na hoti tathāgato paraṃ maraṇāti vā . tathāgato ca kho vaccha arahaṃ sammāsambuddho na rūpaṃ attato samanupassati na rūpavantaṃ vā attānaṃ na attani vā rūpaṃ na rūpasmiṃ vā attānaṃ . na vedanaṃ attato samanupassati .pe. Na saññaṃ . na saṅkhāre . na viññāṇaṃ attato samanupassati na Viññāṇavantaṃ vā attānaṃ na attani vā viññāṇaṃ na viññāṇasmiṃ vā attānaṃ . tasmā tathāgatassa evaṃ puṭṭhassa na evaṃ veyyākaraṇaṃ hoti sassato lokotipi asassato lokotipi antavā lokotipi anantavā lokotipi taṃ jīvaṃ taṃ sarīrantipi aññaṃ jīvaṃ aññaṃ sarīrantipi hoti tathāgato paraṃ maraṇātipi na hoti tathāgato paraṃ maraṇātipi hoti ca na ca hoti tathāgato paraṃ maraṇātipi neva hoti na na hoti tathāgato paraṃ maraṇātipīti.

[798] Acchariyaṃ bho moggallāna abbhutaṃ bho moggallāna yattha hi nāma satthu ceva sāvakassa ca atthena attho byañjanena byañjanaṃ saṃsandissati samessati na vihāyissati yadidaṃ aggapadasmiṃ . Idānāhaṃ bho moggallāna samaṇaṃ gotamaṃ upasaṅkamitvā etamatthaṃ apucchiṃ samaṇopi me gotamo etehi padehi etehi byañjanehi etamatthaṃ byākāsi seyyathāpi bhavaṃ moggallāno . acchariyaṃ bho moggallāna abbhutaṃ bho moggallāna yattha hi nāma satthu ceva sāvakassa ca atthena attho byañjanena byañjanaṃ saṃsandissati samessati na vihāyissati yadidaṃ aggapadasminti. Aṭṭhamaṃ.