[799] Atha kho vacchagotto paribbājako yena bhagavā tenupasaṅkami upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho vacchagotto paribbājako bhagavantaṃ etadavoca purimāni bho Gotama divasāni purimatarāni sambahulānaṃ aññatitthiyānaṃ samaṇabrāhmaṇaparibbājakānaṃ kutuhalasālāyaṃ sannisinnānaṃ sannipatitānaṃ ayamantarākathā udapādi ayaṃ kho pūraṇo kassapo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa so sāvakaṃ abbhatītaṃ kālakataṃ upapattīsu byākaroti asu amutra upapanno asu amutra upapannoti . yopissa sāvako uttamapuriso paramapuriso paramapattipatto tampi sāvakaṃ abbhatītaṃ kālakataṃ upapattīsu byākaroti asu amutra upapanno asu amutra upapannoti. {799.1} Ayampi kho makkhali gosālo . ayampi kho nigaṇṭho nāṭaputto . ayampi kho sañjayo velaṭṭhaputto . ayampi kho pakudho kaccāno . ayampi kho ajito kesakambalo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa sopi sāvakaṃ abbhatītaṃ kālakataṃ uppattīsu byākaroti asu amutra upapanno asu amutra upapannoti . yopissa sāvako uttamapuriso paramapuriso paramapattipatto taṃpi sāvakaṃ abbhatītaṃ kālakataṃ upapattīsu byākaroti asu amutra upapanno asu amutra upapannoti. {799.2} Ayampi kho samaṇo gotamo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa sopi sāvakaṃ abbhatītaṃ kālakataṃ upapattīsu byākaroti asu amutra upapanno asu Amutra upapannoti . yo ca khvassa sāvako uttamapuriso .pe. Asu amutra upapanno asu amutra upapannoti . apica kho naṃ evaṃ byākaroti acchejji taṇhaṃ vivattayi saññojanaṃ sammāmānābhisamayā antamakāsi dukkhassāti . tassa mayhaṃ bho gotama ahudeva kaṅkhā ahu vicikicchā kathañhi nāma samaṇassa gotamassa dhammo abhiññeyyoti .