[111] Atha kho āyasmā sārīputto yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā sārīputto bhagavantaṃ etadavoca āyasmatā bhante channena satthaṃ āharitaṃ tassa kā gati ko abhisamparāyoti . Nanu te sārīputta channena bhikkhunā sammukhāyeva anupavajjatā Byākatāti . atthi bhante pubbavijjanaṃ nāma vajjigāmo tatthāyasmato channassa mittakulāni suhajjakulāni upavajjakulānīti . Honti hete sārīputta channassa bhikkhuno mittakulāni suhajjakulāni upavajjakulānīti . na kho panāhaṃ sārīputta ettāvatā saupavajjoti vadāmi . yo kho sārīputta imañca kāyaṃ nikkhipati aññañca kāyaṃ upādiyati tamahaṃ saupavajjoti vadāmi . taṃ channassa bhikkhuno natthi anupavajjaṃ channena bhikkhunā satthaṃ āharitanti evametaṃ sārīputta dhārehīti. Catutthaṃ.