[115] Caṇḍā kho puṇṇa sunāparantakā manussā pharusā kho puṇṇa sunāparantakā manussā sace taṃ puṇṇa sunāparantakā manussā akkosissanti paribhāsissanti tatra te puṇṇa kinti bhavissatīti . sace maṃ bhante sunāparantakā manussā akkosissanti paribhāsissanti tatra me evaṃ bhavissati bhaddakā vatime sunāparantakā manussā subhaddakā vatime sunāparantakā manussā yaṃ maṃ nayime pāṇinā pahāraṃ dentīti evamettha bhagavā bhavissati evamettha sugata bhavissatīti . sace pana te puṇṇa sunāparantakā manussā pāṇinā pahāraṃ dassanti tatra pana te puṇṇa kinti bhavissatīti . sace me bhante sunāparantakā manussā pāṇinā Pahāraṃ dassanti tatra me evaṃ bhavissati bhaddakā vatime sunāparantakā manussā subhaddakā vatime sunāparantakā manussā yaṃ maṃ nayime leṇḍunā pahāraṃ dentīti evamettha bhagavā bhavissati evamettha sugata bhavissatīti. {115.1} Sace pana te puṇṇa sunāparantakā manussā leṇḍunā pahāraṃ dassanti tatra pana te puṇṇa kinti bhavissatīti. Sace me bhante sunāparantakā manussā leṇḍunā pahāraṃ dassanti tatra me evaṃ bhavissati bhaddakā vatime sunāparantakā manussā subhaddakā vatime sunāparantakā manussā yaṃ maṃ nayime daṇḍena pahāraṃ dentīti evamettha bhagavā bhavissati evamettha sugata bhavissatīti . sace pana te puṇṇa sunāparantakā manussā daṇḍena pahāraṃ dassanti tatra pana te puṇṇa kinti bhavissatīti . sace me bhante sunāparantakā manussā daṇḍena pahāraṃ dassanti tatra me evaṃ bhavissati bhaddakā vatime sunāparantakā manussā subhaddakā vatime sunāparantakā manussā yaṃ maṃ nayime satthena pahāraṃ dentīti evamettha bhagavā bhavissati evamettha sugata bhavissatīti. {115.2} Sace pana te puṇṇa sunāparantakā manussā satthena pahāraṃ dassanti tatra pana te puṇṇa kinti bhavissatīti . Sace me bhante sunāparantakā manussā satthena pahāraṃ dassanti tatra me evaṃ bhavissati bhaddakā vatime sunāparantakā manussā subhaddakā vatime sunāparantakā manussā yaṃ maṃ Nayime tiṇhena satthena jīvitā voropentīti evamettha bhagavā bhavissati evamettha sugata bhavissatīti.