[116] Sace pana te puṇṇa sunāparantakā manussā tiṇhena satthena jīvitā voropessanti tatra pana te puṇṇa kinti bhavissatīti . sace me bhante sunāparantakā manussā tiṇhena satthena jīvitā voropessanti tatra me evaṃ bhavissati santi kho tassa bhagavato sāvakā kāyena ca jīvitena ca aṭṭiyamānā harāyamānā jigucchamānā satthahārakaṃ pariyesanti taṃ me idaṃ pariyiṭṭhaññeva satthahārakaṃ laddhanti evamettha bhagavā bhavissati evamettha sugata bhavissatīti . sādhu sādhu puṇṇa sikkhissasi tvaṃ puṇṇa iminā damūpasamena samannāgato sunāparantasmiṃ janapade vatthuṃ yassadāni tvaṃ puṇṇa kālaṃ maññasīti.

[117] Atha kho āyasmā puṇṇo bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā senāsanaṃ saṃsāmetvā pattacīvaraṃ ādāya yena sunāparanto janapado tena cārikaṃ pakkāmi anupubbena cārikaṃ caramāno yena sunāparanto janapado tadavasari . tatra sudaṃ āyasmā puṇṇo sunāparantasmiṃ janapade viharati . atha kho āyasmā puṇṇo teneva antaravassena pañcamattāni upāsakasatāni paṭidesesi [5]- teneva antaravassena tisso Vijjā sacchākāsi teneva antaravassena parinibbāyi . atha kho sambahulā bhikkhū yena bhagavā tenupasaṅkamiṃsu ekamantaṃ nisinnā kho te bhikkhū bhagavantaṃ etadavocuṃ yo so bhante puṇṇo nāma kulaputto bhagavatā saṅkhittena ovādena ovadito so kālakato tassa kā gati ko abhisamparāyoti . paṇḍito bhikkhave puṇṇo kulaputto ahosi saccavādī dhammassānudhammaṃ na ca dhammādhikaraṇaṃ vihesesi parinibbuto bhikkhave puṇṇo kulaputtoti. Pañcamaṃ.