[135] Na so rajjati rūpesu rūpaṃ disvā paṭissato virattacitto vedeti tañca nājjhosā tiṭṭhati. Yathāssa passato rūpaṃ sevato cāpi vedanaṃ khiyyati no paciyati evaṃ so caratī sato evaṃ apacinato dukkhaṃ santike nibbāna vuccati. Na so rajjati saddesu saddaṃ sutvā paṭissato virattacitto vedeti tañca nājjhosā tiṭṭhati. Yathāssa suṇato saddaṃ sevato cāpi vedanaṃ khiyyati no paciyati evaṃ so caratī sato evaṃ apacinato dukkhaṃ santike nibbāna vuccati. Na so rajjati gandhesu gandhaṃ ghātvā paṭissato virattacitto vedeti tañca nājjhosā tiṭṭhati. Yathāssa ghāyato gandhaṃ sevato cāpi vedanaṃ khiyyati no paciyati evaṃ so caratī sato evaṃ apacinato dukkhaṃ santike nibbāna vuccati. Na so rajjati rasesu rasaṃ bhotvā paṭissato virattacitto vedeti tañca nājjhosā tiṭṭhati. Yathāssa sāyato rasaṃ sevato cāpi vedanaṃ .pe. santike nibbāna vuccati. Na so rajjati phassesu phassaṃ phussa paṭissato virattacitto vedeti tañca nājjhosā tiṭṭhati. Yathāssa phusato phassaṃ sevato cāpi vedanaṃ .pe. santike nibbāna vuccati. Na so rajjati dhammesu dhammaṃ ñatvā paṭissato virattacitto vedeti tañca nājjhosā tiṭṭhati. Yathāssa jānato dhammaṃ sevato cāpi vedanaṃ khiyyati no paciyati evaṃ so caratī sato evaṃ apacinato dukkhaṃ santike nibbāna vuccati. Imassa khvāhaṃ bhante bhagavatā saṅkhittena bhāsitassa evaṃ vitthārena atthaṃ ājānāmīti.

[136] Sādhu sādhu mālukyaputta sādhu kho tvaṃ mālukyaputta mayā saṅkhittena bhāsitassa vitthārena atthaṃ ājānāsi.

[137] Rūpaṃ disvā sati muṭṭhā piyaṃ nimittaṃ manasikaroto sārattacitto vedeti tañca ajjhosā tiṭṭhati. Tassa vaḍḍhanti vedanā anekā rūpasambhavā abhijjhā ca vihesā ca cittamassūpahaññati evaṃ ācinato dukkhaṃ ārā nibbāna vuccati .pe.

[138] Na so rajjati dhammesu dhammaṃ ñatvā paṭissato virattacitto vedeti tañca nājjhosā tiṭṭhati. Yathāssa jānato dhammaṃ sevato cāpi vedanaṃ khiyyati no paciyati evaṃ so caratī sato evaṃ apacinato dukkhaṃ .pe. santike nibbāna vuccati . Imassa kho mālukyaputta mayā saṅkhittena bhāsitassa evaṃ vitthārena attho daṭṭhabboti.