[143] Sāvatthīnidānaṃ .pe. pamādavihāriñca vo bhikkhave desissāmi appamādavihāriñca taṃ suṇātha . kathañca bhikkhave pamādavihārī hoti . cakkhundriyaṃ asaṃvutassa bhikkhave viharato cittaṃ byāsiccati cakkhuviññeyyesu rūpesu tassa byāsittacittassa pāmujjaṃ na hoti pāmujje asati pīti na hoti pītiyā asati passaddhi na hoti passaddhiyā asati dukkhaṃ viharati dukkhino cittaṃ na samādhiyati asamāhite citte dhammā na pātubhavanti dhammānaṃ apātubhāvā pamādavihārītveva saṅkhaṃ gacchati .pe. jivhindriyaṃ asaṃvutassa bhikkhave viharato cittaṃ byāsiccati jivhāviññeyyesu rasesu tassa byāsittacittassa .pe. pamādavihārītveva saṅkhaṃ gacchati .pe. Manindriyaṃ asaṃvutassa bhikkhave viharato cittaṃ byāsiccati manoviññeyyesu dhammesu tassa byāsittacittassa pāmujjaṃ na hoti pāmujje asati pīti Hoti pītiyā asati passaddhi na hoti passaddhiyā asati dukkhaṃ viharati dukkhino cittaṃ na samādhiyati asamāhite citte dhammā na pātubhavanti dhammānaṃ apātubhāvā pamādavihārītveva saṅkhaṃ gacchati. Evaṃ kho bhikkhave pamādavihārī hoti.

[144] Kathañca bhikkhave appamādavihārī hoti . cakkhundriyaṃ saṃvutassa bhikkhave viharato cittaṃ na byāsiccati cakkhuviññeyyesu rūpesu tassa abyāsittacittassa pāmujjaṃ jāyati pamuditassa pīti jāyati pītimanassa kāyo passambhati passaddhakāyo sukhaṃ viharati sukhino cittaṃ samādhiyati samāhite citte dhammā pātubhavanti dhammānaṃ pātubhāvā appamādavihārītveva saṅkhaṃ gacchati .pe. jivhindriyaṃ saṃvutassa bhikkhave viharato cittaṃ na byāsiccati .pe. appamādavihārītveva saṅkhaṃ gacchati .pe. manindriyaṃ saṃvutassa bhikkhave viharato cittaṃ na byāsiccati manoviññeyyesu dhammesu tassa abyāsittacittassa pāmujjaṃ jāyati pamuditassa pīti jāyati pītimanassa kāyo passambhati passaddhakāyo sukhaṃ vedayati sukhino cittaṃ samādhiyati samāhite citte dhammā pātubhavanti dhammānaṃ pātubhāvā appamādavihārītveva saṅkhaṃ gacchati . Evaṃ kho bhikkhave appamādavihārī hotīti. Catutthaṃ.