[449] Yo bhikkhave maggo yā paṭipadā taṇhakkhayāya saṃvattati taṃ maggaṃ taṃ paṭipadaṃ bhāvetha . katamo ca bhikkhave maggo katamā ca paṭipadā taṇhakkhayāya saṃvattati . yadidaṃ satta bojjhaṅgā . katame satta. Satisambojjhaṅgo .pe. Upekkhāsambojjhaṅgoti.

[450] Evaṃ vutte āyasmā udāyi bhagavantaṃ etadavoca kathaṃ bhāvitā nu kho bhante satta bojjhaṅgā kathaṃ bahulīkatā taṇhakkhayāya saṃvattantīti . idha udāyi bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ [2]- vipulaṃ mahaggataṃ appamāṇaṃ abyāpajjhaṃ tassa satisambojjhaṅgaṃ bhāvayato vivekanissitaṃ virāganissitaṃ nirodhanissitaṃ vipulaṃ mahaggataṃ appamāṇaṃ abyāpajjhaṃ taṇhā pahīyati .pe. upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vipulaṃ mahaggataṃ appamāṇaṃ abyāpajjhaṃ tassa upekkhāsambojjhaṅgaṃ bhāvayato vivekanissitaṃ virāganissitaṃ nirodhanissitaṃ vipulaṃ mahaggataṃ appamāṇaṃ abyāpajjhaṃ taṇhā pahīyati taṇhāya pahānā kammaṃ pahīyati kammassa pahānā dukkhaṃ pahīyati . Iti kho udāyi taṇhakkhayā kammakkhayo kammakkhayā dukkhakkhayoti.