[522] Sāvatthīnidānaṃ . pañcannañca vo bhikkhave nīvaraṇānaṃ sattannañca bojjhaṅgānaṃ āhārañca anāhārañca desessāmi taṃ suṇātha.

[523] Ko ca bhikkhave āhāro anuppannassa vā kāmacchandassa uppādāya uppannassa vā kāmacchandassa bhiyyobhāvāya vepullāya . Atthi bhikkhave subhanimittaṃ tattha ayonisomanasikārabahulīkāro ayamāhāro anuppannassa vā kāmacchandassa uppādāya uppannassa vā kāmacchandassa bhiyyobhāvāya vepullāya.

[524] Ko ca bhikkhave āhāro anuppannassa vā byāpādassa uppādāya uppannassa vā byāpādassa bhiyyobhāvāya vepullāya . Atthi bhikkhave paṭighanimittaṃ tattha ayonisomanasikārabahulīkāro ayamāhāro anuppannassa vā byāpādassa uppādāya uppannassa vā byāpādassa bhiyyobhāvāya vepullāya.

[525] Ko ca bhikkhave āhāro anuppannassa vā thīnamiddhassa uppādāya uppannassa vā thīnamiddhassa bhiyyobhāvāya vepullāya . Atthi bhikkhave arati tandi vijambhikā bhattasammado cetaso ca līnattaṃ tattha ayonisomanasikārabahulakāro ayamāhāro anuppannassa vā thīnamiddhassa uppādāya uppannassa vā thīnamiddhassa Bhiyyobhāvāya vepullāya.