[698] Bhūtapubbaṃ bhikkhave sakuṇagghī lāpaṃ sakuṇaṃ sahasā ajjhappattā aggahesi . atha kho bhikkhave lāpo sakuṇo sakuṇagghiyā hariyamāno evaṃ paridevesi mayamevamha alakkhikā Mayaṃ appapuññā ye mayaṃ agocare carimha paravisaye . sacajja mayaṃ gocare careyyāma sake pettike visaye na myāyaṃ sakuṇagghī alaṃ abhavissa yadidaṃ yuddhāyāti . ko pana te lāpa gocaro sako pettiko visayoti. Yadidaṃ naṅgalakaṭṭhakaraṇaṃ leḍḍuṭṭhānanti. {698.1} Atha kho bhikkhave sakuṇagghī sake bale apatthaddhā sake bale avādamānā lāpaṃ sakuṇaṃ pamuñci gaccha kho tvaṃ lāpa tatrapi me gantvā na mokkhasīti . atha kho bhikkhave lāpo sakuṇo naṅgalakaṭṭhakaraṇaṃ leḍḍuṭṭhānaṃ gantvā mahantaṃ leḍḍuṃ abhirūhitvā sakuṇagghiṃ vadamāno aṭṭhāsi ehi khodāni me sakuṇagghi ehi khodāni me sakuṇagghīti . atha kho sā bhikkhave sakuṇagghī sake bale apatthaddhā sake bale avādamānā ubho pakkhe sandhāya lāpaṃ sakuṇaṃ sahasā ajjhappattā . yadā kho bhikkhave aññāsi lāpo sakuṇo bahu āgatā kho myāyaṃ sakuṇagghīti athasseva leḍḍussa antaraṃ paccupādi . atha kho bhikkhave sakuṇagghī tattheva uraṃ paccatāḷesi . Evañhetaṃ bhikkhave hoti yo agocare carati paravisaye.

[699] Tasmā tiha bhikkhave mā agocare carittha paravisaye. Agocare bhikkhave carataṃ paravisaye lacchati māro otāraṃ lacchati māro ārammaṇaṃ . ko ca bhikkhave bhikkhuno agocaro paravisayo . Yadidaṃ pañca kāmaguṇā . katame pañca . cakkhuviññeyyā rūpā iṭṭhā kantā manāpā piyarūpā kāmūpasañhitā rajaniyā Sotaviññeyyā saddā . ghānaviññeyyā gandhā . jivhāviññeyyā rasā . kāyaviññeyyā phoṭṭhabbā iṭṭhā kantā manāpā piyarūpā kāmūpasañhitā rajaniyā. Ayaṃ bhikkhave bhikkhuno agocaro paravisayo.