[781] Ekaṃ samayaṃ āyasmā ca sārīputto āyasmā ca mahāmoggallāno āyasmā ca anuruddho sākete viharanti kaṇṭakīvane . atha kho āyasmā ca sārīputto āyasmā ca mahāmoggallāno sāyaṇhasamayaṃ paṭisallānā vuṭṭhitā yenāyasmā anuruddho tenupasaṅkamiṃsu upasaṅkamitvā āyasmatā anuruddhena saddhiṃ sammodiṃsu sammodanīyaṃ kathaṃ sārāṇīyaṃ vītisāretvā ekamantaṃ nisīdiṃsu . ekamantaṃ nisinno kho āyasmā sārīputto āyasmantaṃ anuruddhaṃ etadavoca

[782] Sekkho sekkhoti āvuso anuruddha vuccati kittāvatā nu kho āvuso sekkho hotīti . catunnaṃ kho āvuso satipaṭṭhānānaṃ padesaṃ bhāvitattā sekkho hoti . katamesaṃ catunnaṃ . idhāvuso bhikkhu kāye kāyānupassī viharati ātāpī sampajāno satimā vineyya loke abhijjhādomanassaṃ . vedanāsu citte dhammesu dhammānupassī viharati ātāpī sampajāno satimā vineyya loke abhijjhādomanassaṃ . imesaṃ kho āvuso catunnaṃ satipaṭṭhānānaṃ padesaṃ bhāvitattā sekkho hotīti.