[975] Evamme sutaṃ ekaṃ samayaṃ bhagavā sākete viharati añjanavane migadāye . tatra kho bhagavā bhikkhū āmantesi atthi nu kho bhikkhave pariyāyo yaṃ pariyāyaṃ āgamma yāni pañcindriyāni tāni pañca balāni honti yāni pañca balāni tāni pañcindriyāni hontīti . bhagavaṃmūlakā no bhante dhammā bhagavaṃnettikā bhagavaṃpaṭisaraṇā sādhu vata bhante bhagavantaṃyeva paṭibhātu etassa bhāsitassa attho bhagavato sutvā bhikkhū dhāressantīti .pe.

[976] Atthi bhikkhave pariyāyo yaṃ pariyāyaṃ āgamma yāni pañcindriyāni tāni pañca balāni honti yāni pañca balāni tāni pañcindriyāni honti . katamo ca bhikkhave pariyāyo yaṃ pariyāyaṃ āgamma yāni pañcindriyāni tāni pañca balāni honti yāni pañca balāni tāni pañcindriyāni honti.

[977] Yaṃ bhikkhave saddhindriyaṃ taṃ saddhābalaṃ yaṃ saddhābalaṃ taṃ saddhindriyaṃ yaṃ viriyindriyaṃ taṃ viriyabalaṃ yaṃ viriyabalaṃ taṃ viriyindriyaṃ yaṃ satindriyaṃ taṃ satabalaṃ yaṃ satibalaṃ taṃ satindriyaṃ yaṃ samādhindriyaṃ Taṃ samādhibalaṃ yaṃ samādhibalaṃ taṃ samādhindriyaṃ yaṃ paññindriyaṃ taṃ paññābalaṃ yaṃ paññābalaṃ taṃ paññindriyaṃ.

[978] Seyyathāpi bhikkhave nadī pācīnaninnā pācīnapoṇā pācīnapabbhārā tassā majjhe dīpo . atthi bhikkhave pariyāyo yaṃ pariyāyaṃ āgamma tassā nadiyā eko sototveva saṅkhaṃ gacchati. Atthi pana bhikkhave pariyāyo yaṃ pariyāyaṃ āgamma tassā nadiyā dve sotānitveva saṅkhaṃ gacchati.