[1283] Ekaṃ samayaṃ āyasmā anuruddho sāvatthiyaṃ viharati andhavanasmiṃ ābādhiko dukkhito bāḷhagilāno . atha kho sambahulā bhikkhū yenāyasmā anuruddho tenupasaṅkamiṃsu upasaṅkamitvā āyasmantaṃ anuruddhaṃ etadavocuṃ katamenāyasmato anuruddhassa vihārena viharato uppannā sārīrikā dukkhā vedanā cittaṃ na pariyādāya tiṭṭhantīti.

[1284] Catūsu kho me āvuso satipaṭṭhānesu sūpaṭṭhitacittassa viharato uppannā sārīrikā dukkhā vedanā cittaṃ na pariyādāya tiṭṭhanti . katamesu catūsu . idhāhaṃ āvuso kāye kāyānupassī viharāmi . vedanāsu citte dhammesu dhammānupassī viharāmi ātāpī sampajāno satimā vineyya loke abhijjhādomanassaṃ . Imesu kho me āvuso catūsu satipaṭṭhānesu sūpaṭṭhitacittassa viharato uppannā sārīrikā dukkhā vedanā cittaṃ na pariyādāya tiṭṭhantīti. Rahogatavaggo paṭhamo. Tassuddānaṃ rahogatena dve vuttā sutanukaṇṭakī tayo taṇhakkhayasalaḷāgāraṃ ambapāligilāyananti . -----------