[1548] Sāvatthīnidānaṃ . tena kho pana samayena anāthapiṇḍiko gahapati ābādhiko hoti dukkhito bāḷhagilāno . atha kho anāthapiṇḍiko gahapati aññataraṃ purisaṃ āmantesi ehi tvaṃ ambho purisa yenāyasmā sārīputto tenupasaṅkama upasaṅkamitvā mama vacanena āyasmato sārīputtassa pāde sirasā vanda anāthapiṇḍiko bhante gahapati ābādhiko dukkhito bāḷhagilāno so āyasmato sārīputtassa pāde sirasā vandatīti . evañca vadehi sādhu kira bhante āyasmā sārīputto yena anāthapiṇḍikassa gahapatissa nivesanaṃ tenupasaṅkamatu anukampaṃ upādāyāti . evaṃ bhanteti kho So puriso anāthapiṇḍikassa gahapatissa paṭissutvā yenāyasmā sārīputto tenupasaṅkami upasaṅkamitvā āyasmantaṃ sārīputtaṃ abhivādetvā ekamantaṃ nisīdi . ekamantaṃ nisinno kho so puriso āyasmantaṃ sārīputtaṃ etadavoca anāthapiṇḍiko bhante gahapati ābādhiko dukkhito bāḷhagilāno so āyasmato sārīputtassa pāde sirasā vandati . evañca vadeti sādhu kira bhante āyasmā sārīputto yena anāthapiṇḍikassa gahapatissa nivesanaṃ tenupasaṅkamatu anukampaṃ upādāyāti . adhivāsesi kho āyasmā sārīputto tuṇhībhāvena.

[1549] Atha kho āyasmā sārīputto pubbaṇhasamayaṃ nivāsetvā pattacīvaramādāya āyasmatā ānandena pacchāsamaṇena yena anāthapiṇḍikassa gahapatissa nivesanaṃ tenupasaṅkami upasaṅkamitvā paññatte āsane nisīdi . nisajja kho āyasmā sārīputto anāthapiṇḍikaṃ gahapatiṃ etadavoca kacci te gahapati khamanīyaṃ kacci yāpanīyaṃ kacci dukkhā vedanā paṭikkamanti no abhikkamanti . paṭikkamosānaṃ paññāyati no abhikkamoti . na me bhante khamanīyaṃ na yāpanīyaṃ bāḷhā me dukkhā vedanā abhikkamanti no paṭikkamanti abhikkamosānaṃ paññāyati no paṭikkamoti.

[1550] Yathārūpena kho gahapati buddhe aveccappasādena samannāgato assutavā puthujjano kāyassa bhedā paraṃ maraṇā apāyaṃ Duggatiṃ vinipātaṃ nirayaṃ upapajjati tathārūpo te buddhe appasādo natthi . atthi ca kho te gahapati buddhe aveccappasādo itipi so bhagavā .pe. satthā devamanussānaṃ buddho bhagavāti . tañca pana te buddhe aveccappasādaṃ attani samanupassato ṭhānaso vedanā paṭippassambheyyuṃ .