[1568] Sāvatthīnidānaṃ . tena kho pana samayena anāthapiṇḍiko gahapati ābādhiko hoti dukkhito bāḷhagilāno . atha kho Anāthapiṇḍiko gahapati aññataraṃ purisaṃ āmantesi ehi tvaṃ ambho purisa yenāyasmā ānando tenupasaṅkama upasaṅkamitvā mama vacanena āyasmato ānandassa pāde sirasā vanda anāthapiṇḍiko bhante gahapati ābādhiko dukkhito bāḷhagilāno so āyasmato ānandassa pāde sirasā vandatīti . evañca vadehi sādhu kira bhante āyasmā ānando yena anāthapiṇḍikassa gahapatissa nivesanaṃ tenupasaṅkamatu anukampaṃ upādāyāti . evaṃ bhanteti kho so puriso anāthapiṇḍikassa gahapatissa paṭissutvā yenāyasmā ānando tenupasaṅkami upasaṅkamitvā āyasmantaṃ ānandaṃ abhivādetvā ekamantaṃ nisīdi . Ekamantaṃ nisinno kho so puriso āyasmantaṃ ānandaṃ etadavoca anāthapiṇḍiko bhante gahapati ābādhiko dukkhito bāḷhagilāno . So āyasmato ānandassa pāde sirasā vandati evañca vadeti sādhu kira bhante āyasmā ānando yena anāthapiṇḍikassa gahapatissa nivesanaṃ tenupasaṅkamatu anukampaṃ upādāyāti . adhivāsesi kho āyasmā ānando tuṇhībhāvena.

[1569] Atha kho āyasmā ānando pubbaṇhasamayaṃ nivāsetvā pattacīvaramādāya yena anāthapiṇḍikassa nivesanaṃ tenupasaṅkami upasaṅkamitvā paññatte āsane nisīdi . nisajja kho āyasmā ānando anāthapiṇḍikaṃ gahapatiṃ etadavoca

[1570] Kacci te gahapati khamanīyaṃ kacci yāpanīyaṃ kacci Dukkhā vedanā paṭikkamanti no abhikkamanti paṭikkamosānaṃ paññāyati no abhikkamoti . na me bhante khamanīyaṃ na yāpanīyaṃ bāḷhā me dukkhā vedanā abhikkamanti no paṭikkamanti abhikkamosānaṃ paññāyati no paṭikkamoti.

[1571] Catūhi kho gahapati dhammehi samannāgatassa assutavato puthujjanassa hoti utrāso hoti chambhitattaṃ hoti samparāyikaṃ maraṇabhayaṃ . katamehi catūhi . idha gahapati assutavā puthujjano buddhe appasādena samannāgato hoti . tañca panassa buddhe appasādaṃ attani samanupassato hoti utrāso hoti chambhitattaṃ hoti samparāyikaṃ maraṇabhayaṃ . puna caparaṃ gahapati assutavā puthujjano dhamme appasādena samannāgato hoti . tañca panassa dhamme appasādaṃ attani samanupassato hoti utrāso hoti chambhitattaṃ hoti samparāyikaṃ maraṇabhayaṃ . puna caparaṃ gahapati assutavā puthujjano saṅghe appasādena samannāgato hoti . tañca panassa saṅghe appasādaṃ attani samanupassato hoti utrāso hoti chambhitattaṃ hoti samparāyikaṃ maraṇabhayaṃ . puna caparaṃ gahapati assutavā puthujjano dussīlyena samannāgato hoti . tañca panassa dussīlyaṃ attani samanupassato hoti utrāso hoti chambhitattaṃ hoti samparāyikaṃ maraṇabhayaṃ . imehi kho gahapati catūhi dhammehi samannāgatassa Assutavato puthujjanassa hoti utrāso hoti chambhitattaṃ hoti samparāyikaṃ maraṇabhayaṃ.