[1710] Ekaṃ samayaṃ sambahulā therā bhikkhū cetiyesu viharanti sahajaniye . tena kho pana samayena sambahulānaṃ therānaṃ bhikkhūnaṃ pacchābhattaṃ piṇḍapātapaṭikkantānaṃ maṇḍalamāḷe sannisinnānaṃ sannipatitānaṃ ayamantarākathā udapādi yo nu kho āvuso dukkhaṃ passati dukkhasamudayaṃpi so passati dukkhanirodhaṃpi passati dukkhanirodhagāminiṃ paṭipadaṃpi passatīti.

[1711] Evaṃ vutte āyasmā gavampatitthero bhikkhū etadavoca Sammukhā metaṃ āvuso bhagavato sutaṃ sammukhā paṭiggahitaṃ yo bhikkhave dukkhaṃ passati dukkhasamudayaṃpi so passati dukkhanirodhaṃpi passati dukkhanirodhagāminiṃ paṭipadaṃpi passati . yo dukkhasamudayaṃ passati dukkhaṃpi so passati dukkhanirodhaṃpi passati dukkhanirodhagāminiṃ paṭipadaṃpi passati . yo dukkhanirodhaṃ passati dukkhaṃpi so passati dukkhasamudayaṃpi passati dukkhanirodhagāminiṃ paṭipadaṃpi passati . yo dukkhanirodhagāminiṃ paṭipadaṃ passati dukkhaṃpi so passati dukkhasamudayaṃpi passati dukkhanirodhaṃpi passatīti. Koṭigāmavaggo tatiyo. Tassuddānaṃ dve vajjī sammāsambuddho arahaṃ āsavakkhayo mittaṃ tathā ca loko ca abhiññeyyaṃ gavampatīti. -----------